• Йеңилиқлар
• 26 Ақпан, 2015

«Алтун дохтур»

Бу аилидики йәттә пәрзәнт йәттә түрлүк кәсипни егилиди, Гөзәл болса, дохтурлуқни таллавалди. Ата устаз болғанлиқтинму балилириға «сән у яки бу кәсипни егиләйсән» дәп ейтқини йоқ.  Һәркимни өз хаһишиға қоюп бәрди. Балиларниң һәммиси ата-ана ишәнчисини ақлап, җәмийитимиздин өзлириниң мунасип орнини тапти.Мәктәпни «әла» баһаға тамамлиған, лекин «алтун медаль» алалмиған қизиға атиси, пешқәдәм устаз Һемитахун Тохтасунов: «Сизниң келәчәктә алтун қоллуқ дохтур болидиғиниңизға ишинимән» дәп дуасини бериду. Атиниң еғизидин «пал» чиққан екән. *** 1974-жили Гөзәл Тохтасунова мәктәпни тамамлап, Алмута дөләт медицина институтиға чүшиду. Уни 1980-жили муваппәқийәтлик тамамлап, уттур Алмута шәһәрлик балилар жуқумлуқ кесәлликлири ағриқханисиға ишқа орунлишиду. Бийил униң бир орунда ишләватқиниға 35 жил болди. У кичигидинла балиларға амрақ болған екән. Шуңлашқа у бу кәсипкә тез муһәббәт бағлап, униң билән чапсанла «ичәкишип» кәтти. *** Алмутида ишләп жүрүп, у кәспи бойичә энергетик Мирғияс Әсмәтовқа турмушқа чиқиду. Яшлар некадин өткән күни ЗАГС хадиминиң «келин өзиниң фамилиясидә қаламду яки...» дегән соалиға қиз ойланмайла: «Йолдишимниң фамилиясигә өтимән» дәп җавап бәргән екән. Шундақ қилип, дунияға кәйни-кәйнидин икки оғул кәлди — Рашид билән Диас. Гөзәл Әсмәтова әйнә шу икки пәрзәнт туғулғандила өйдә олтирипту. Қалған вақтини болса, ишта өткүзиду. «Гөзәл пәқәт қоли алтун дохтурла әмәс, у тамаққиму наһайити уста. Шуңлашқа уни һәр күни тақәтсизлик билән күтимиз» дәп аялини махтап қойди акимиз. «У өйдә әмәс, ишида «дәм алиду», чүнки у әйнә шундақ өз кәспини сөйидиған дохтур». Буму Мирғияс акиниң гепи. *** Гөзәл Һемитахун қизи хизмәт балдақлиридиму тез көтирилди: врач, бөлүм башлиғи, баш врачниң орунбасари, баш врач. У рәһбәрликтә узақ олтармиди. Бари-йоқи йәттә ай. Ағриқханиға күндә келип чүшиватқан балиларниң әһвалидин хәвәрдар болуп, уларни давалап, у яқ-бу яққа жүгрәп үгинип қалған дохтур бир күни «балилиримни сеғинип кәттим» дедидә, рәһбәрликниң креслосини бошитип бәрди. *** Гөзәл Һемитахун қизини өйдә тутуш мүмкин болмиғандин кейин ишиға кәлдим. Униң билән әркин олтирип сөзлишиш мүмкин болмиди. Ишикни иливалсақ, телефонға арам йоқ. Янфонниғу өчирип қутулдуқ. Амма ишниң телефонини өчиришкә болмайду: кимду-бири ярдәм сорап телефон қилиши мүмкин. — Яш вақтимда бир тонушниң балисини давалиған едим, кейин у нәврисини елип кәлди, — дәп сөзини давам қилди Гөзәл Һемитахун қизи. — Әву күни «чәврәм ағрип қалди» дәп телефон қипту. Мана шундақ әвлаттин- әвлатқа өтүп, бәзиләрниң шәхсий врачиға айландим.  Кечиси телефон қилип охитивалидиғанларму бар техи. Һәммисиниң көңлини елишқа тиришимән. Бала ағриғандин худайим сақлисун. Гөдәкләр «мону йерим ағриватиду» дәп ейталмайдиғу. Биз, дохтурлар, ата-ана билән балиниң арисидики «тәрҗиманниң» ролини атқуримиз. Һазирқи күндә экологияниң тәсириму, әтималим, туғулушидин өпкә ағриғиниң зәрдавини тартиватқан балилар көп. Иккиниң бири аллергия. Әйнә шундақ бемарларни күндә көрүп, жүрәкләрму моҗулуп кәтти. Бу йәрдә пәқәт кәспини чин дилидин сөйгән адәмла ишләләйду. *** Биз гәп қиливатқан балилар ағриқханиси Алмута шәһириниң Бостандық наһийәсигә орунлашқан. Өткән жили Гөзәл Һемитахун қизи «Наһийәниң әң илғар врачи» аталди. Наһийә турғунлириниң тәливи шундақ болди. Мундақ әхбаратни наһийәлик һакимийәтниң хадимлири мәзкүр ағриқханиниң «Пикирләр вә тәклипләр» китавидин алди. Мәзкүр китапта Гөзәл Һемитахун қизиниң намиға йезилған иллиқ гәпләр бесим көпчиликни тәшкил қилиду. Иккиниң бири уни «Алтун қоллуқ врач», дәп язған. Булту Алмута шәһири бойичә әң күчлүк врачларниң «бәйгиси» уюштурулуп, униңға  иштрак қилған Гөзәл Әсмәтова иккинчи орунни йеңивалди. Биринчи орун 5-ағриқханида ишләйдиған бир алимға буйрупту. Шуңлашқа шу жилила Қазақстан врачлири вә провизорлири ассоциацияси униңға «Алтун дохтур» дегән атақни бәрди. *** Пенсиягә чиқип, дәм алғум бар, амма сөйүмлүк ишимни қиймаймән, — дәйду Гөзәл Һемитахун қизи. — Өткәндә ағриқханиниң баш врачи Ержан Қоштай оғли чақиривелип: «Йәнә он жил ишләп берисиз, сиздәк алтун дохтурлар бизниң саһаға һавадәк һаҗәт» дәп қалди. «Он жилға вәдә берәлмәймән», бәш жил ишләп берәй, дедим. Кетәй десәм, балилар көз алдимға келиду. У йәнә бемарларниң гепини қиливатиду...  Бәхтишат СОПИЕВ.