• Әхбаратлар еқими
• 16 Наурыз, 2015

Муһим мәсилиләр муһакимә қилинди

Йеқинда «Нур Отан» партияси Әмгәкчиқазақ наһийәлик шөбисиниң новәттин ташқири ХІV конференцияси болуп өтти. Униңға наһийә һакими, наһийәлик партия шөбисиниң рәиси Бинәли Ысқақ, наһийәлик мәслиһәт кативи Әдилбай Талқанбаев вә партия активистлири, Қазақстан хәлқи Ассамблеясиниң әзалири, уруш вә әмгәк ветеранлири, һөкүмәтлик әмәс  тәшкилатларниң вә «Жас Отан» Яшлар қанитиниң вәкиллири қатнашти.Конференцияниң күн тәртиви бойичә наһийәлик ички сәясәт бөлүминиң башлиғи Мөмүнҗан Исламов Улуқ Ғалибийәтниң 70 жиллиғи һарписида наһийәдә истиқамәт қиливатқан уруш ветеранлириға, уларниң рәпиқилиригә маддий вә мәнивий ярдәмләр көрситиливатқанлиғи, мундақ ярдәмдин арқа сәп ветеранлириму сирт қалмайдиғанлиғи һәққидә ейтип өтти. Мәлумки, һазир елимиз муһим сәясий вақиәгә тәйярлиқ көрүватиду. Қазақстан Җумһурийити  Президентиниң муддәттин илгири сайлими 26-апрель күнигә бәлгүләнди. Конференция давамида бу мәсилиму муһакимә қилинди. Сайламға қазақстанлиқлар бир кишидәк қатнишиши шәрт. Сәвәви, әл келәчигини ишәшлик адәмгә тапшуруш – өзимизниң қолида. Һазирчә Президентлиққа намзатлар ениқ тиркилип болмиди. «Нур Отан» партияси намидин Нурсултан Әбиш оғли Назарбаевниң намзитини тәклип қиливатқан қазақстанлиқларниң сани күн санап өсүватиду. Сөзгә чиққан Челәк йеза округи Ақсақаллар кеңишиниң рәиси Әбилбек Айтақынов, наһийәниң Пәхрий граждини Кәрим Худайбәрдиев вә Түргүн йеза округи яшлар сәясити мәркизиниң әзаси Айгерим Сматова шөбә рәисиниң пикрини бир еғиздин қоллап, елимизни аләмшумул боһрандин аман чиқидиған  ялғуз рәһбәр Нурсултан Назарбаев екәнлигини атап өтти. Рашидәм РӘҺМАНОВА. Әмгәкчиқазақ наһийәси.