• Йеңилиқлар
• 16 Наурыз, 2015

Қазақстан хәлқи Ассамблеясиниң «Нур Отан» партияси XVІ қурултийиниң Н.Ә. Назарбаевни Қазақстан Җумһурийитиниң Президентлиғиға намзат қилип көрситиш тоғрилиқ қарарини қоллап-қувәтләш һәққидә мураҗиити

Һөрмәтлик вәтәндашлар! Бүгүн пүткүл Қазақстан хәлқи Вәтинимиз һаятидики тәғдиранә тарихий вақиәниң қатнашқучиси вә шаһиди болди. «Нур Отан» партиясиниң XVІ қурултийи бир еғиздин Нурсултан Әбиш оғли Назарбаевни новәттики муддәткә Қазақстан Җумһурийити Президентлиғиға намзат қилип көрсәтти.«Нур Отан» партияси қурултийиниң қарари Қазақстан хәлқи Ассамблеясиниң новәттин ташқири Президент сайлимини 2015-жили өткүзүш тоғрилиқ умумхәлиқниң қоллап-қувәтлишигә егә болған тәшәббусиниң чоңқур асаслиқ екәнлигиниң вә қанунийлиғиниң ярқин испати болуп һесаплиниду. 28-февральда Қазақстан хәлқи Ассамблеяси Милләт Лидери, Қазақстан Җумһурийитиниң Тунҗа Президенти Нурсултан Әбиш оғли Назарбаевқа өз намзитини новәттин ташқири Президент сайлимиға көрситиш илтимаси билән мураҗиәт қилған еди. Бу қәдәмгә елимиз билән униң хәлқиниң тәғдири үчүн жуқури җавапкәрлик, җәмийәтниң турақлиғини вә бирлигини, әтики күнгә болған чин ишәнчини, иш орунлириниң вә иҗтимаий төләмләрниң, иш һәққиниң, стипендияләрниң сақлинишини тәминләшкә нисбәтән нийәт түрткә болған еди. Бу тәшәббусни йүз миңлиған граждан, чоң санаәт карханилириниң коллективлири, аграр секторниң ишчилири, һөкүмәтлик әмәс тәшкилатлар вә этномәдәнийәт бирләшмилири қоллап-қувәтлиди. Шуниң арқилиқ Қазақстан хәлқи жүргүзүлүватқан тәңпуң ички вә ташқи сәясәтни толуқ һәм қәтъий қоллап-қувәтләйдиғанлиғини, жуқури гражданлиқ җавапкәрлигини вә вәтәнпәрвәрлигини намайиш қилди. Қазақстан хәлқи Ассамблеяси әмәлдики Президент Нурсултан Әбиш оғли Назарбаевниң Қазақстан Президентлиғиға намзат сүпитидә көрситилишини қизғин қоллап-қувәтләйду. Мундақ қәдәм дөләт вә җәмийәтниң ениқ иш-һәрикәт программисиниң — «Нұрлы жол — келәчәккә башлайдиған йол» йеңи ихтисадий сәяситиниң әмәлгә ашурулушиниң, җавапкәрлик, изчил һәм тоғра ички вә ташқи сәясәтниң буниңдин кейинму муқәррәр орунлинишиниң асаслиқ шәрти болуп һесаплиниду. Нурсултан Әбиш оғлиниң Президент сайлимиға қатнишиши — бу вәтәнпәрвәрлик иш-һәрикәт, мәмликәтни изчил тәрәққий әткүзүш вә гражданлиримизниң паравәнлигини ашуруш бойичә асаслиқ вәзипиләрни һәл қилиш үчүн ихтисатни турақлаштурушниң, гражданлиқ течлиқни, иҗтимаий турақлиқни, хәлиқниң җипсилиғини күчәйтишниң күчлүк башланмиси болуп һесаплинидиған жуқури гражданлиқ қәриз һәм җавапкәрлик һис-туйғусиниң көрүнүши. Нурсултан Әбиш оғли Назарбаевниң абройи, униң сәясий даналиғи вә тәҗрибиси, хәлиқниң ишәнчиси вә һөрмити сайлам кампаниясиниң мунасип дәриҗидә өткүзүлүшиниң капалити болуп, Қазақстан гражданлириниң өз хаһишини әркин изһар қилишини тәминләйду. Әмәлдики Президент намзитиниң көрситилиши хәлиқара бирләшмә үчүн Қазақстанниң ташқи сәяситиниң — течлиқ вә разимәнлик сәяситиниң, ишәнчә вә конструктивлиқ сәяситиниң — өзгәрмәйдиғанлиғиниң салмақлиқ испати болиду, дәп ишинимиз. Қазақстан хәлқи Ассамблеяси келәчәк алдидики җавапкәрликни һис қилип, хәлиқ вә мәмликәтниң алий мәнпийәтлиригә асаслинип, гражданлиқ вә вәтәнпәрвәрлик пәрзини орунлаш мәхситидә елимизниң барлиқ гражданлирини новәттин ташқири Президент сайлимиға паал қатнишишқа вә аваз бериш арқилиқ өз хаһишини билдүрүшкә чақириду. Биз Қазақстанниң барлиқ гражданлирини келәчәк әвлат үчүн, елимизниң паравәнлиги вә гүллиниши үчүн өзиниң конституциялик һоқуқини пайдилинишқа, хаһишини әркин изһар қилишқа, сайламда аваз беришкә вә җәмийитимизниң турақлиғини һәм бирлигини мустәһкәмләшкә һәссә қошушқа чақиримиз.

Астана шәһири, 2015-жил 11-март.