• Хәйрихаһлиқ
• 10 Сәуір, 2015

Жүрәктин — жүрәккә

Бурнакүн Қ.Ғоҗамияров намидики җумһурийәтлик дөләт Уйғур музыкилиқ комедия театрида Җумһурийәтлик Уйғур этномәдәнийәт мәркизиниң вә «Пәрваз» иҗрачилар бирләшмисиниң қоллап-қувәтлиши вә униң йенидики Қазақстан Уйғур Яшлири бирлигиниң мәдәнийәт кеңишиниң рәиси Ринат Зерәковниң вә сәнъитимиз җанкөйәри Мурат Әйсаровниң (сүрәттә) уюштурушида еғир ағриққа дучар болған Ибрагим Турсуновқа ианә топлаш мәхситидә хәйрихаһлиқ чарә-тәдбир болуп өтти. Алди билән театр бенасида йәрмәңкә уюштурулуп, униң ахири Қазақстан эстрада юлтузлири вә уйғур иҗрачилириниң иштракидики чоң концертқа улашти. Һәрхил назу-немәтләр билән таамлар, һүнәрвәнләр мәһсулатлири, кийим-кечәк вә китаплар содиға селинип, униңдин чүшкән мәбләғ икки яшлиқ Ибрагимниң йеқинлириға тапшурулди. Буниңдин ташқири, бир топ косметологлар меһманларға хизмәт көрситип, уларму алған һәққини толуғи билән һаяти қил үстидә туруватқан гөдәкниң һесап-чотиға әвәтти. Андин көпчилик тәқәзалиқ билән күткән концерт башлинип, уни җумһурийәтлик Уйғур этномәдәнийәт мәркизиниң рәиси Шаһимәрдан Нурумов ечип, мундақ деди: — Бүгүнки хәйрихаһлиқ концерт һәм йәрмәңкә шуни көрситидуки, биз, Қазақстан уйғурлири, бешиға күн чүшкән һәрбир адәмгә, униң ким болушидин қәтъий нәзәр, қанчилик дәриҗидә меһриванлиқ билән қарайдиғанлиғимизниң испатидур. Мошундақ чарә-тәдбирдә силәрниң зални толтуруп олтарғиниңлар қериндишимиз Ибрагим Турсуновниң тәғдиригә бепәрва әмәс екәнлигиңларни көрситиду.  Илаһим, һәрқачан мошундақ өм, иҗил-инақ өтәйли. Шундақла натиқ Қазақстан хәлқи Ассамблеясиниң иш-реҗилири даирисидә өткүзүлүватқан ушбу хәйрихаһлиқ чарә-тәдбирниң уюштурғучилириға миннәтдарлиқ изһар қилди. Мошу йәрдә инсанларниң бир-биригә болған меһриванлиқ вә һисдашлиқ туйғулирини ойғитишқа қабил чарә-тәдбирниң уютқуси болған ҖУЭМ йенидики Қазақстан Уйғур Яшлири бирлиги әзалириниң вә нами көпчилик арисида аммибап болған “Дәрвишләр”, “Дамино”, “Нур”, “Дияр” топлири,  йәккә нахшичилар Артур Илахунов, Расул Зайитов вә башқиму сәнъәткарларниң көп күч чиқарғанлиғини алаһидә тәкитләп өтүш орунлуқтур. Концерт ахирида уюштурғучиларниң бири Ринат Зерәков Ибрагимниң дадиси Илзат Һошуровқа һәр икки мәрасимдин чүшкән 1 275 541 тәңгини тапшурди. Рашидәм МИРЗӘХМӘТОВА