- Йеңилиқлар
- 18 Мамыр, 2012
Ассамблеяләр достлуқни күчәйтмәктә
Қазақстан хәлқи Ассамблеясиниң делегацияси ҚХА рәисиниң орунбасари — Қазақстан Җумһурийити Президенти мәмурийити КХА кативатиниң рәһбири Ералы Тоғжановниң рәһбәрлигидә Россия Федерациясиниң Чеченстан Җумһурийитидә рәсмий сәпәрдә болди. Мәзкүр сәпәр Чеченстан президенти Рамзан Қадыровниң тәкливигә бенаән уюштурулди.
Делегация тәркивигә Парламент Сенатиниң депутати, «Роһий разимәнлик конгресси» хәлиқ ара фондиниң президенти Төлеген Мухамеджанов, Мәҗлис депутатлири — «Вайнах» Чечен вә ингуш хәлиқиниң мәдәнийитини тәрәққий әткүзүш ассоциациясиниң қош рәиси Ахмед Мурадов вә Қазақстан Корей ассоциациясиниң рәиси Роман Ким, язғучи, Қазақстанниң хизмәт көрсәткән әрбаби Әким Тарази, Қарағанда вилайәтлик «Вайнах» чечен-ингуш этномәдәнийәт бирләшмисиниң рәиси Увайс Джанаев, Маңғыстав вилайәтлик «Хәлиқ разимәнлиги» җәмийәтлик бирләшмисиниң рәиси Магомед Лорсанов, «Хабар» телеканалиниң журналисти вә оператори Арман Изжанов билән Едил Ермекбаев кирди.
Қазақстан делегацияси Грозныйда Тунҗа Президент Нурсултан Назарбаев намидики 1-лицейни, «Назарбаев өйини», Н.Назарбаев намидики кочини, Чеченстанниң Тунҗа президенти, Россия Қәһримани Ахмад-һаҗи Қадыровниң Центарой йезисидики қәбрини, «Шөһрәт аллеяси» мемориал комплексини зиярәт қилди. Қазақстанлиқлар Чеченстан рәссамлири билән һүнәрвәнлири әсәрлириниң көргәзмиси билән тонушти, улар үчүн Грозный, Гудермес, Аргун шәһәрлири бойичә сәяһәтләр уюштурулди.
Делегация әзалири Рамзан Қадыров, җумһурийәт Парламентиниң депутатлири, җәмийәт әрбаплири, Чеченстан Җумһурийити хәлиқлири Ассамблеяси кеңишиниң әзалири билән учрашти. ҚХА делегацияси шундақла Чеченстан хәлиқлириниң Хатирә вә матәм күнигә беғишланған чарә-тәдбирләргә вә «Грозный» дөләт телерадио комплексиниң «Таянч нуқтилири» телепрограммисиға қатнашти.
Мошу барлиқ чарә-тәдбирләр давамида Чеченстан вәкиллири бу қетимқи сәпәргә чоң әһмийәт берип, чеченларниң Қазақстанға, униң хәлқигә вә Милләт Лидери Нурсултан Назарбаевқа алаһидә һөрмәт билән мунасивәт қилидиғанлиғини тәкитлиди.
Ералы Тоғжанов җавап сөзлиридә җумһурийәт рәһбәрлигигә сәмимий һәм иллиқ қобул қилғанлиғи үчүн миннәтдарлиқ билдүрди вә мустәқилликниң дәсләпки күнлиридин тартипла дөлитимиз рәһбириниң мәмликәтниң ички вә ташқи сәяситини течлиқ һәм разимәнлик принциплири асасида түзгәнлигини тәкитлиди. Бу болса, Қазақстанниң көп милләтлик хәлқигә течлиқ һәм тәртипни тәминлиди.
— Қазақ вә чечен хәлиқлирини көплигән умумий нәрсиләр бағлаштуриду. Биз илгиридин тартипла янму-ян яшап, әмгәк қилип келиватимиз. Бүгүнму биз пайдилиқ тәҗрибә билән ортақлишишимиз, өз ара һәрикәт қилишимиз, әң муһими, моҗут алақиларни күчәйтишимиз вә кәңәйтишимиз керәк, — деди ҚХА рәисиниң орунбасари.
Сәпәр вақтида Қазақстан хәлқи Ассамблеяси вә Чеченстан Җумһурийити хәлиқлири Ассамблеясиниң оттурисида Һәмкарлиқ тоғрилиқ келишим имзаланди.
567 рет
көрсетілді0
пікір
