• Кәсипдаш һәққидә сөз
• 06 Мамыр, 2015

Өз ишиниң маһири

Бәзән өзимиз ишләватқан әмгәк коллективини иккинчи аилигә қияс қилимиз. Буму тәбиий нәрсә, чүнки узун жиллар мабайнида бир мәхсәттә меһнәт қиливатқан адәмләр билән ичәкишип, худди қериндашлардәк, йеқин болуп кетидикәнсән. Өзәм рәһбәрлик қиливатқан уйғур наһийәлик «Казпочта» алақә бөлүмидики Нәвирдин Меримов әйнә шулар җүмлисидиндур.Алмутидики алақә техникумини пүтирип, 1990-жили наһийәлик алақә тармиғи мәһкимисигә ишқа орунлашқан Нәвирдинниң әмгәк паалийити йезилиқ почта алақисиниң бөлүмчилирини башқуруштин башланған. Икки жилдин кейин у почта алақиси инструктори хизмитигә йөткилип, тиришчанлиғи билән көзгә чүшти. Мәлумки, бу түзүм өзгирип, мәһкимиләр қурулумлирида өзгиришләр йүз бериватқан пәйтләр еди. Җүмлидин мәзкүр мәһкимиму телекоммуникация тармақлири вә почта алақиси мәһкимилири болуп иккигә бөлүнди. Шунда Нәвирдин Ғоҗәхмәт оғли почта алақиси мәһкимисидә қалдурулуп, чоң инструктор болуп тайинланди. 2007-жили мәһкимә тизгини маңа тапшурулди. Тәбиийки, һәрқандақ  иш җәриянида рәһбәргә салаһийәтлик орунбасарниң болғини әвзәл. Бизниң мисалимизда, нәқ шу Нәвирдин Ғоҗәхмәт оғли орунбасарлиққа һәммә җәһәттин мунасип еди. Чүнки беваситә мәһкимидә вә униң йезилардики бөлүмчилиридә почта алақиси паалийитини заман тәливигә мунасип уюштуруш мәхситидә вақит билән һесаплашмай әмгәк қилишқа тоғра келиду. Бир сөз билән ейтқанда, мәһкимә паалийитиниң отидин кирип, сүйидин чиқиш лазим. Мана, мошу ишларниң һөддисидин Нәвирдин Ғоҗәхмәт оғли шәрәп билән чиқмақта. Ейтмақчи, униң өмүрлүк җүпти Айнурәмму мошу мәһкиминиң хадими әр-аял икки пәрзәнт сөйүп, уларниң заманимизниң мунасип избасарлири қилип тәрбийилиди. Бу күнлири уларниң аилисидә чоң хошаллиқ вә униңға бизму ортақ. Йәни, Нәвирдин Ғоҗәхмәт оғли 6-май күни 50 яшқа толди. Шу мунасивәт билән шәхсән өзәмниң вә барлиқ кәсипдашлирим намидин тәвәллуд егисини қизғин тәбрикләп, узақ өмүр, саламәтлик, аиләвий бәхит вә җавапкәрлик ишида утуқ тиләймән!

Бәхитҗан БӘХТАХУНОВ,

«Қазпочта» АҖ Уйғур наһийәлик шөбисиниң башлиғи.