• Йеңилиқлар
• 06 Мамыр, 2015

Мениң чекист акам

Чоң Ақсу. Лутпулла Мутәллип намидики коча. Бу кочида Улуқ Вәтән урушиниң ветерани Аруп ака Адиков яшиған. У һәдәм Аминәмниң йолдиши. Иккимиз әтә-ахшими мошу кочини бойлап, талай қетим муңдашқан едуқ. Аруп акам фин, андин Улуқ Вәтән урушиға қатнашқан. Уруш тоғрилиқ анчә ечилип-йейилип сөзләп кәтмәтти. Униң сәвәвини мән кейин чүшәндим. Аруп акам уруш жиллири 5-партизанлар отрядиниң чекистлар бригадисида хизмәт қилған. Әрлиги түпәйли көплигән орден-медальлар билән тәғдирләнгән. Уларниң ичидә «Җасарити үчүн» медалиниң қәдир-қиммити башқичә. Бу униңға Белоруссиядә дүшмәнни уҗуқтуруш бойичә әмәлгә ашурулған операциягә қатнашқини үчүн берилди. Бу еғир җәңдә сол путидин яридар болиду. Мән бир қетим униңдин «Чекистлар немә оқәт қилиду?», дәп соридим. «Чекистлар чекистларниң оқитини қилиду» дегән еди камсөзлүк акимиз. Мана, Ғалибийәтниң 70 жиллиғи һарписида мән уни әсләватимән. Уруштин кейин Аруп акам Чонҗа йезисидики һәрбий қисимда, өзиниң тили билән ейтқанда, «чекист» болуп хизмәт қилди. Өмүрлүк җүпти Аминәм Абдуллаева иккиси йәттә пәрзәнт тепип, қатарға қошти. Уларниң җәмийитимизгә лайиқ адәмләрдин қилип тәрбийилиди. Аминәм һәдәм Қәһриман ана. Әпсус, бүгүн мениң үчүн әйнә шундақ қиммәтлик инсанлардин болған қериндашлирим аримизда йоқ. ... «Чекист» акам яшиған коча хәлқимизниң мунәввәр пәрзәнди Лутпулла Мутәллипниң намида атилиду. Мошу йезидики бир кочини Аруп Адиковниң нами билән атиғум келиду. Униму батурларға қияс қилимән. Амма, у мениң қолумдики иш әмәс...

Аблемит ҖАППАРОВ.

Уйғур наһийәси.