• Йеңилиқлар
• 06 Мамыр, 2015

Һәммигә инақлиқ тилигән

Хаталашмисам, икки-үч яшлиқ чағлирим болса керәк, биз Уйғур наһийәсидин Алмута шәһириниң Дружба мәһәллисигә көчүп кәлдуқ. Баһар пәсли еди. Бир күни бизниң һойлиға һәрбий кийим кийгән салапәтлик адәм кирип кәлди. Мән уни тонумидим һәм апамдин «Бу адәм ким?» дәп сориведим, у җавап бәргичә байиқи киши иним иккимизни диккидә қилип қучиғиға олтарғузивалдидә, «Мән силәрниң чоң дадаңлар болимән», дәп пешанимизгә сөйүп қойди. Кейинирәк билсәк, у Улуқ Вәтән урушиниң қатнашқучиси вә әмгәк ветерани бизниң чоң дадимиз Һашим Нәсирдинов екән. У 1904-жили Уйғур наһийәсиниң Чоң Ақсу йезисида дуния келиду. 1924-жили Ташкәнт шәһиридики һәрбий училищесиға оқушқа чүшиду.  Уни тамамлап, рәһбәрликниң буйруғи билән 1933-жилғичә шу яқта взвод командири болуп хизмәт қилиду. Кейинирәк Алмутиға келип, Түркстан һәрбий округи тәркивидики вилайәтлик һәрбий комиссарниң биринчи орунбасари лавазимиға тайинлиниду. У бу хизмитидиму зиммисигә жүкләнгән вәзипиләрни әстаидил һәм җавапкәрлик билән атқуриду. Улуқ Вәтән уруши башланған жилниң күз айлирида Хорезмға шәһәрлик Һәрбий тәйярлиқ бөлүминиң башлиғи болуп әвәтилиду. Шу йәрдин фронтқа атлинип, рота, батальон вә полк командири сүпитидә нурғунлиған шәһәрләрни азат қилиш җәңлиригә қатнишип, Берлинғичә бариду. Униң үчүн қанлиқ уруш 1946-жили әтияз пәслидә аяқлишиду. Һашим Нәсирдиновниң урушта көрсәткән җасарити мунасип баһалинип, «Қизил Юлтуз», «Қизил Туғ», «Александр Невский» вә башқиму жуқури дәриҗилик орден-медальлар билән тәғдирлиниду. Шундақ қилип, чоң дадам үчүн уруш аяқлишип, у Кеңәш Армиясидин һөрмәтлик дәм елишқа чиқиду. Алаһидә тәкитләш лазимки, у қәйәрдила әмгәк қилмисун, дайим һәммини бирликкә, инақлиққа чақирип, қолидин кәлгән ярдимини айимайдиған. Буниңға мән униң бизниң өйүмизгә кәлгәнлигини аңлап, йетип келидиған достлириниң көплигини көргинимдә көз йәткүздүм. Мундақ чағларда дадамдин «Улар чоң дадамни нәдин тонуйду?» дәп сорисам, «Уруш пәйтлиридә вә хизмәттә болған жиллири уларға хелила көп ярдәмләшкән екән», дәйдиған мәрһум дадам. Һаятиниң көп қисмини һәрбий хизмәткә беғишлиған чоң дадам 1974-жили дуниядин өтти. Амма униң беһөддә өтмигән өмри бизгә, йәни әвлатлириға, үлгә-нәмунә екәнлиги талашсиз. Реһангүл ХУДАЙБӘРДИЕВА, пешқәдәм уссулчи.