• Йеңилиқлар
• 14 Мамыр, 2015

Һәрбий парад елимизниң қудритини намайиш қилди

7-май күни «Қазақ Елі» монументи алдидики мәйданда Вәтән һимайичилири күнигә вә Улуқ Вәтән урушидики Ғалибийәтниң 70 жиллиғиға беғишланған һәрбий парад болуп өтти. Бу мустәқил Қазақстан тарихидики әң чоң һәрбий парад болуп, униңға 5 миңға йеқин һәрбий хизмәтчи, 200дин ошуқ қурал-ярақ вә һәрбий техника бирлиги, 70 вертолет вә самолет қатнашти. Селиштуруш үчүн тәкитләймизки, өткән жилқи парадқа 2,5 миңдин ошуқ һәрбий хизмәтчи қатнашқан еди.Парадта заманивий қурал билән бирқатарда Улуқ Вәтән уруши вақтидики армия вә қурал-ярақ көрситилди. Байрақдар топниң Қазақстан Дөләт байриғини вә Ғалибийәт байриғини — вәтәндишимиз Рақимжан Қошқарбаев билән униң сәпдиши Григорий Булатов буниңдин 70 жил илгири Рейхстаг үстигә тиккән байрақниң ениқ көчәрмисини елип чиқиш парадқа алаһидә тәнтәнилик түс бәрди. Җәңгивар байрақ Қазақстанға Москвадики Поклонная горадин кәлтүрүлди. Парадқа Қазақстан Җумһурийити Қураллиқ күчлири Пиядә әскәрләрниң баш қомандани генерал-лейтенант Мурад Майкеев башқурди. Парадни мудапиә министри Иманғали Тасмағамбетов қобул қилди. Қураллиқ күчләрниң Алий баш қомандани Нурсултан Назарбаев автомобильда парад сәплирини айлинип өтүп, расчетларни тәбриклиди. Дөләт рәһбири барлиқ қазақстанлиқларни Вәтән һимайичилири күни вә Улуқ Вәтән урушидики Ғалибийәтниң 70 жиллиғи билән мубарәклиди. Икки мәйрәмниң бириниң кәйнидин бири келиши алаһидә рәмзгә егә. Бу Улуқ Вәтән урушидики ғалиплар вә Вәтинимиз һимайичилириниң һазирқи әвладиниң һәрбий әнъәнилириниң варислиғини көрситиду. Мәйдандики һәрбий җасарәт вә арқа сәптики пидакарлиқ әмгәк Ғалибийәтни қолға кәлтүрүштики асасий амиллардин болуп һесаплиниду. Инсанийәт тарихидики наһайити нурғун вәйранчилиқ елип кәлгән уруштики Улуқ Ғалибийәткә хәлқимиз бебаһа һәссә қошти. Урушқа атланған бир миллион 200 миң жутдишимизниң тәң йерими җәң мәйданлирида һалак болди. 500дин ошуқ қазақстанлиқ Кеңәш Иттипақиниң қәһримани унваниға сазавәр болди. Уруш жиллирида пүткүл хәлқимиз арқа сәптә ишләш үчүн җипсилашти. Дүшмәнгә етилған он оқниң тоққузи биздә чиқирилди. Атилиримизниң җасарити вә анилиримизниң әмгиги хәлиқ хатирисидә мәңгү қалиду. Ғалибийәтлиримизниң тарихи — вәтәнпәрвәрликниң вә бирликниң һәқиқий үлгиси, — деди Президент. Дөләт рәһбири шундақла уруш вә әмгәк ветеранлирини Улуқ Ғалибийәт билән тәбрикләп, уларниң җәңгиварлиқ һәм әмгәк җасаритиниң барлиқ әвлатларниң хатирисидә мәңгү қалидиғанлиғини атап көрсәтти. Бизниң барлиқ утуқлиримиз — йеңи ғалибийәтләр үчүн рәғбәт. Бийил 20 жиллиғини нишанлайдиған Конституция «Биз, Қазақстан хәлқи» дегән сөзләр билән башлиниду. Бу көпмилләтлик хәлиқ бирлигиниң пухта формулиси. Биз асасий қәдрийәтләрни — мустәқилликни, течлиқ вә разимәнликни мәңгү сақлишимиз керәк. Барлиқ дөләт институтлириниң вә һәрбир қазақстанлиқниң қәрзи мошу қәдрийәтләрни күзитиштин ибарәт. Һимайичиләрниң дәсләпки сепидә бизниң шанлиқ Қураллиқ күчлиримиз туриду, —  дәп тәкитлиди Нурсултан Назарбаев. Алий баш қомандан шундақла мәмликәтниң һәрбий хизмәтчилиригә мураҗиәт қилип, уларниң зиммисигә Қазақстанниң суверенитетини вә гражданларниң хатирҗәмлигини сақлаш охшаш шәрәплик вәзипиниң жүкләнгәнлигини қәйт қилди. Андин кейин парад башлинип, парад расчетлири вә Улуқ Вәтән уруши жиллиридики һәм заманивий һәрбий техника мәйдан арқилиқ өтти. Һәрбий учқучлар болса, асманда 70 дегән рәқәмни түзүп, тамашибинларни Улуқ Ғалибийәт мәйрими билән тәбриклиди. Мудапиә министрлигиниң умумий оркестриниң 250тин ошуқ һәрбий музыканти парадни музыкилиқ җәһәттин тәминлиди. Умумән, Астанадики Вәтән һимайичилири күнигә вә Улуқ Ғалибийәтниң 70 жиллиғиға беғишланған мәйрәмлик чарә-тәдбирләргә 260 уруш ветеран қатнашти.