• Спорт
• 21 Мамыр, 2015

«Рембо» «ушу-саньда шаһи» аталди

Алмутиниң Қайрат мәһәллисигә спорт клуби үчүн бена селишқа тиҗарәтчи Тиләпҗан Йүсүпов униң ечилиш мәрасимида сөзгә чиқип, «клубниң намини «Нийәт» қояйли, нийитимиз дурус болса, аримиздин чемпионларму чиқип қалар» дегән еди. Әйнә шундақ спорт клуби «Нийәт» дәп аталған мәзкүр спорт клубида бүгүнки күндә 80гә йеқин бала шәриқниң йәкму-йәк күрәшлири билән шуғуллиниду. Клубниң әң кичик әзаси йәттә яшта. Спорт клубиниң мәшиқләндүргүчиси, хәлиқара дәриҗидики спорт маһири Имәрҗан Идиллаевниң ейтишичә, яш спортчилар сәккиз жилниң ичидә талай «җәңләргә» қатнишип, устазиниң ишәнчисини ақлап келиветипту. Кейинки алтә айниң ичидила «Нийәт» спорт клубиниң әзалири жумһурийәт вә шәһәр миқиясида өткән чоң бәш мусабиқиға иштрак қилған. Арилиқта бир ай дәм алған балилар һазир шәриқниң һәрхил йәкму-йәк күришиш түрлири бойичә өткүзүлидиған дуния чемпионатиға қатнишиш нийитидә тәр төкмәктә. Ейтиш керәкки, булту ноябрь ейида нийәтликләр ушу-саньда бойичә өткүзүлгән җумһурийәтлик турнирда үч алтун, төрт күмүч вә үч бронза медаль елишқа муйәссәр болса, мошу жилниң январь ейида шәһәрлик турнирға қатнишип, сәккиз алтун медальни ғоҗуниға салди. Шуниңдин кейин бир ай өтүп, Ақтав шәһиридә яшлар вә өсмүрләр арисида  уюштурулған жумһурийәтлик чемпионаттинму үч алтун, бәш күмүч, алтә бронза медаль билән қайтти. Апрель ейида Алмутида өсмүрләр арисида өткән шәһәрлик мусабиқидә йәнә алтә алтун медальға қол йәткүзди. Йеқинда Чимкәнт шәһиридә болуп өткән ушу-саньда бойичә җумһурийәтлик турнирниң уюштурғучилири мошу спорт түри билән шуғулланғучиларниң «шаһини» ениқлашни мәхсәт қилған еди. «Нийәт» спорт клубидин униңға 27 бала қатнишип, Нурһаҗидин Нәсирдинов, Артур Нәвирдинов, Илшат Султанмуратов, Батырхан Шәрипов, Арман Хамитов, Сухраб Әкрәмов, Айбек Алыбай, Фарид Нәмәтов қатарлиқ спортчилар алтун, йәнә йәттә бала күмүч вә алтә бала бронза медальлири билән тәғдирләнди. Әнди спортниң мәзкүр түри билән тинмай шуғуллинип, сәпдашлири арисида «Рембо» аталған Ризайдин Райлин болса, 56 килограмм салмақ категорияси бойичә рәқиплирини тиз пүктүрүп «Ушу саньда шаһи» аталди. Чимкәнттин мундақ чоң утуқ билән қайтқан спортчиларни Алмутида күтүвалған Тиләпҗан Йүсүпов барлиқ спортчиларни җүмлидин уларниң устази Имәрҗан Идиллаевни алаһидә тәбрикләп, андин «Рембоға» ат миндүрди һәм униң хәлиқара ринглардин көрүнүшигә тиләк билдүрди. «Келәчәктә «Нийәттин» дуния чемпиони чиқиши керәк», деди у спортчиниң қолини қисип. Әсли униң нийити баштила шундақ болған. Өз новитидә Имәрҗан тонулған спортчилар, устазлири Долқун Қамеков билән Алик Җәлиловни, шундақла Уйғур вә Талғир наһийәлиридин «Нийәткә» йеқиндин яр-йөләк болуватқан мәшиқләндүргүчиләр Толик Сопиев, Виждан Узарбеков, Әркин Абләһәтовларниң исимлириниму тилға алди. Бәхтишат СОПИЕВ. СҮРӘТЛӘРДӘ: 1. «Рембо» Ризайдин Райлин. 2. Тиләпҗан Йүсүпов билән Имәрҗан Идиллаев турнир қатнашқучилири билән.