• Спорт
• 21 Мамыр, 2015

Головкин төмүр Тайсонниң рекордини йеңилимақта

Өткән йәкшәнбә күни қазақстанлиқ кәспий боксчи АҚШта өзиниң 33-йәкму-йәк күришини өткүзүп, йәнә қәрәлидин илгири ғалибийәт қазанди. У бу қетим америкилиқ терә пәләй маһири кичик Вилле Манро билән WBA (Super), ІBO  вә WBC (Іnterіm) тәхминлири бойичә оттура салмақтики дуния чемпиони нами үчүн күч синишип, җәңни 6-раундта аяқлаштурди. Шундақ қилип, бизниң боксчи атақлиқ Майк Тайсонниң йәнә бир рекордиға өзгириш киргүзди.Йәкму-йәк Америкиниң Калифорния штатидики Инглвуд шәһириниң «Форум» спорт комплексида өтти. Геннадий Головкин адәттикидәк дәрһал һуҗумға чиқип, Монрони баш көтәргүзмәй қойди. Иккинчи раундта болса, бизниң жутдишимиз рәқивини икки қетим нокдаунға чүширип үлгәрди. Бирақ америкилиқ боксчи гонг берилгичә орнидин туруп кәтти. Үчинчи раундта Геннадийниң һуҗуми сәл-пәл бесилғандәк билинди. Буни Вилле тоғра пайдилинип, бирнәччә қарши һуҗумларни утуқлуқ уюштурди. Униңдин кейинки төртинчи вә бәшинчи раундларму америкилиқниң бесимлиғи билән өтти. Мошу мәзгилдә қазақстанлиқ бокс ишқивазлириниң «Головкин йеңилип қаларму?» дегән әндишидә болғанлиғиму ениқ. Бирақ Головкин рәқивиниң еғир мушлириға бәрдашлиқ берип, пәйдин-пәй бесимлиқни өз қолиға елишқа башлиди. Алтинчи раундни Гена наһайити қизғинлиқ билән башлиди. Униң бирнәччә муши рәқивигә дәл тегип, Монрони мәңдитип қойди. Йәнә бир еғир муш америкилиқни нокаутқа чүшәрди. Рингтики арбитр бармақлирини пүкүп санашқа башлиди. Америкилик атлет арбитр «он» дегән санни ейтиши биләнла орнидин аран турди. Бирақ рефери җәңни давамлаштуруш мүмкин әмәс дәп һесаплиди: техникилиқ нокаут! Шундақ қилип Геннадий Головкин кәспийләр рингидики новәттики утуққа йәтти. Бу Қарағанда шәһиридә туғулған 33 яшлиқ спортчи 2015-жилқи — иккинчи, умумий һесапта 33-утуғиға қол йәткүзди. У бу җәңләрниң оттузини нокаут билән аяқлаштурса, уларниң кейинки жигирмисини уда қәрәлидин илгири тамамлаватиду. Дунияниң үч тәхмини бойичә оттура салмақтики әң яхши боксчи атиливатқан Гена уда қол йәткүзгән нокаутлар сани бойичә атақлиқ Майк Тайсонниң рекордини йеңилиди. Америкилиқ боксчи Головкинниң уда нокаутқа чүшәргән 20-рәқиви болди. Әнди Тайсон уда 19 рәқивини мошундақ усул билән йәңгән еди. Головкинниң бу қетимқи тапавити илгәркилиридин хелила нурғун болди. Униңға мошу утуғи үчүн 1,5 миллион доллар һәқ төләнди.