• Йеңилиқлар
• 11 Маусым, 2015

Ғалибийәтниң Тәңтуши

 «Азия Газ» ширкити Уйғур наһийәлик шөбисиниң башлиғи, Уйғур наһийәсиниң вә Алмута вилайитиниң Пәхрий граждини, Алмута вилайәтлик мәслиһәтниң депутати Сәйдәхмәт Қасимов 15 йешида қолиға гүжәк-кәтмән елип, та бүгүнки күнгичә әмгәктин қол үзгини йоқ.55 жил бойи пәқәт әмгәк билән яшаватқан Сәйдәхмәт Бәрахун оғли ахирқи он икки жил мабайнида жутдашларниң муң-муһтажини вилайәт дәриҗисидә һәл қилиш үчүнму бар күч-ғәйрити билән тиришип жүриду.  Бәзи һаятий муһим мәсилиләрниң әмәлиятта өз әксини тепишида наһийә хәлқиниң вилайәтлик мәслиһәттики вәкилиниң әҗри бар дәп ишәшлик ейталаймиз. Мәсилән, аһалини ичидиған су билән тәминләш, мәктәп вә ағриқханиларни мурәккәп җөндәштин өткүзүш мәсилилири шу җүмлидиндур. Сәйдәхмәт Бәрахун оғли Уйғур наһийәсиниң Чоң Ақсу йезисида туғулған. Атиси Бәрахун Улуқ Вәтән урушиниң дәсләпки күнлирила алдинқи сәпкә атлинип, дүшмән билән болған дәсләпки әң еғир җәңләргә қатнашқан. 1942-жили еғир җараһәтлинип, һәрбий комиссия қарари билән ана жутқа қайтурулған у Долата йезисидики Калинин намидики колхозни башқурған. Бәрахун ата билән Һекимхан ана йәттә пәрзәнди билән Чонҗа йезисиға көчүп кәлгинидә, саламәтлиги яр бәрмәй, аран жүргән атисиға қол-қанат болуш истигидә йезидики йол қурулуши мәһкимисигә ишқа орунлашқан Сәйдәхмәт әйнә шу мәһкимидә бир жил ишчи болуп ишлиди. Кейинки жили шоферлар курсини пүтирип, 16 йешида жүк машинисиниң рулиға олтарди. Йеши кичик болсиму, ойи чоң жигит та 1980-жилғичә  мәзкүр мәһкимидә ишләп, пидакаранә әмгиги бәдилигә «Қазақ ССРниң Пәхрий йол қурулушчиси» атиғиға еришти. Алмута шәһиридики йеза егилиги институтида инженер-механик кәспи бойичә сирттин билим елип, мол һаятий вә кәспий тәҗрибә топлиған Сәйдәхмәт Бәрахун оғлини наһийә рәһбәрлиги дәсләп наһийәләрара Челәк газ участкисини башқурушқа йоллап, кейинирәк Чонҗа йезисидики йолувчиларни тошуш автопарки мудириниң орунбасари лавазимиға тайинлиди. Мәзкүр мәһкиминиң мудири, һели мәрһум Йолдаш Ахмоллаев билән хелә вақит биллә ишлигән Сәйдәхмәт Бәрахун оғлиниң уни устазим дәп һөрмәт қилишиму беҗиз әмәс. Чүнки тәҗрибилик рәһбәр өзиниң орунбасарини көпниң мәнпийити үчүн көпчилик билән ишләш маһаритигә үгәткән еди. 1990-жили наһийәләрара Челәк газ егилиги тәркивидики Уйғур наһийәлик газ участкисини башқурушқа кәлгән Сәйдәхмәт акиниң тәшәббуси билән үч жилдин кейин наһийәдә айрим газ егилиги қурулуп, аһалиға хизмәт көрситишкә башлиди. Ахирқи бирнәччә жил мабайнида Сәйдәхмәт Бәрахун оғли вилайәттә тәбиий газ тармақлирини таритиш билән шуғуллиниватқан «Азия Газ» ширкитиниң наһийәдики шөбисини башқурмақта. Һазирчә наһийә аһалисини газ баллонлири билән тәминләватқан мәзкүр ширкәтниң кәлгүсидики реҗилири зор. Буйриса, хәлиқ тәбиий газ билән тәминлинидиған болиду. Сәйдәхмәт Бәрахун оғлиниң өмүрлүк җүпти Гүлинур Нәзәр қизиму наһийә ихтисадиниң өсүшигә үлүш қошқан аниларниң бири. У колхозларара қурулуш мәһкимисидә узун жиллар давамида инженер болуп ишлиди. 1984-1988-жиллири санаәт комбинатини башқурған тәҗрибилик рәһбәр 1996-жилғичә наһийә мәркизидики тикинчилик фабрикисиға йетәкчилик қилди. 1992-жили елимиз Президенти Н.Ә.Назарбаев наһийәгә иш-сәпәр билән кәлгинидә, мошу фабрикини зиярәт қилди вә шәхсән фабрика мудири Гүлинур Нәзәр қизиға утуқ тилигән. Миңға йеқин ишчини башқурушму асан әмәс, әлвәттә. Арман-арзуси, мәхсәт-хаһиши пүтмигән адәм яшашқа интилип, һәрбир күнини адил әмгәк билән өткүзүшкә тиришидиғини һәқ. Буни тинимсиз  әмгәк егиси Сәйдәхмәт Бәрахун оғлиниң мисалидин рошән көримиз. Жилниң кириши билән һаятиниң 70-даваниға чиққан һөрмәтлик инсанни тәвәллуди билән тәбрикләп, униңға узақ өмүр, саламәтлик, бәхит вә хатирҗәмлик тилигүмиз келиду.

    Махмут ИСРАПИЛОВ.

    Уйғур наһийәси.