• Йеңилиқлар
• 10 Шілде, 2015

Хәлиқара форум болуп өтти

Өткән һәптидә Астанада «Н.Ә. Назарбаевниң җәмийәтлик разимәнлик вә миллий бирлик қазақстанлиқ үлгиси: Азиядики өзара иш-һәрикәт вә ишәнчә чарилири бойичә кеңәш кәңлигидики тәҗрибә» мавзусида Азиядики өзара иш-һәрикәт вә ишәнчә чарилири бойичә кеңишиниң миллий-мәдәнийәт мәркәзлириниң хәлиқара форуми болуп өтти.Униңға дунияниң 13 дөлитидин делегатлар, Азиядики өзара иш-һәрикәт вә ишәнчә чарилири бойичә кеңәш әллири миллий-мәдәнийәт мәркәзлири вә хәлиқара тәшкилатларниң, Азиядики өзара иш-һәрикәт вә ишәнчә чарилири бойичә кеңәшкә әза дөләтләрниң дипломатиялик миссиялириниң, Қазақстан Җумһурийити дөләт органлириниң вәкиллири, ҚХА әзалири вә миллий мәдәнийәт мәркәзлириниң рәислири қатнашти. Форумни киришмә сөз билән ачқан Қазақстан Җумһурийити Мәдәнийәт вә спорт вице-министри Марат Азилханов: «Мәзкүр форум региондики турақлиқни, бехәтәрликни вә һәмкарлиқни күчәйтиш йолидики мәйданға айланди. Бу йәрдә һәммимиз толерантлиқ вә ишәнчә принциплириға риайә қилимиз» деди. Форум даирисидә «Азиядики өзара иш-һәрикәт вә ишәнчә чарилири бойичә кеңәш: турақлиқ вә паравәнликкә», «Мәдәнийәтләрара һәмкарлиқ: Азиядики өзара иш-һәрикәт вә ишәнчә чарилири бойичә кеңәш әллириниң мәдәний мираслири», «Этномәдәний бирләшмиләрниң илмий ихтидари: экспертлар билән һәмкарлиқ» «Масс-медиадики этномәдәнийәт вә толерантлиқ» мавзусида хәлиқара миллий-әмәлий конференция өтти. Бу конференциядә сөз алған дипломатлар этномәдәнийәт бирләшмиләрниң вәкиллири, җәмийәтлик разимәнлик вә миллий бирликниң қазақстанлиқ үлгисиниң утуқлуқ екәнлигини, һәм бу учришиш ҚХАниң қурулғининиң 20 жиллиғи даирисидә өтүватқанлиғини тәкитләшти. «Қазақстан үлгисигә қизиқиватқанлар көпийиватиду. Мана ахирқи бир йерим жилдила бизгә 20 дөләт тәҗрибә алмаштуруш тәкливи билән мураҗиәт қилди. Бизниң дөләтлиримиз һәрхил, әнъәнилиримиз, тарихимиз, мәдәнийитимиз вә менталитетимизму һәрхил, амма һәммимизгә умуминсаний қәдрийәтләр муҗәссәмләнгән. Бу үлгидә мошу қәдрийәтләрниң һәммиси өз әксини тапқан. Бизниң дөлитимиздә йүздин ошуқ милләт яшаватиду. Миллий вә җәмийәтлик разимәнликни тәминләш механизмлири башқа дөләтләрни қизиқтуруватқанлиғини тәсадипи әмәс», деди ҚХА рәисиниң орунбасари — ҚХА кативатиниң рәһбири Ералы Тоғжанов. Мәлумки, мошундақ дәсләпки форум 2002-жили Алмутида өткән. Бу учришишни өткүзүш тәшәббусини Қазақстан Президенти Нурсултан Назарбаев көтәргән еди. Мәзкүр форумда сөз алған Бангладеш Хәлиқ Җумһурийити Парламентиниң әзаси Фазле Хусейн Бадша: «Бизниң дөлитимиздиму мошундақ мәсилиләр моҗут. Шуңлашқа қазақстанлиқ үлгини жуқури баһалаймиз вә үгинимиз», деди. Форум даирисидә миллий мәдәний мәркәзләр тәрипидин тәйярланған көргәзмә уюштурулди. Форумниң секцияләр бойичә ишлири даирисидә Бангладештин кәлгән делегация билән ҚХА рәисиниң орунбасари Ералы Тоғжанов, ҖУЭМ рәиси вә ҚХА Кеңишиниң әзаси Шаһимәрдан Нурумов, Президент йенидики дөләт башқуруш академиясидики милләтләрара вә динларара мунасивәтләрни тәтқиқ қилиш мәркизиниң рәиси Айгүл Садвақасова «дүгләк үстәл» әтрапида учришип, Ассамблеяниң паалийити һәққидә мәлуматлар бәрди.