• Йеңилиқлар
• 06 Тамыз, 2015

Миқияслиқ лайиһә

Қазақстан Җумһурийитиниң Президенти йенидики Мәркизий коммуникацияләр хизмитидә Қазақстан хәлқи Ассамблеясиниң «Чоң мәмликәт — чоң аилә» миқияслиқ лайиһисини тәйярлашқа һәм әмәлгә ашурушқа беғишланған мәтбуат конференцияси өткүзүлди. Униңда Қазақстан хәлқи Ассамблеяси кеңишиниң әзаси, ихтисат пәнлириниң доктори Анатолий Башмаков, Қазақстан Җумһурийитиниң Президенти йенидики «Қоғамдық келісім» җумһурийәтлик дөләт мәһкимисиниң мудири Наталья Калашникова, шундақла униң орунбасари Ғазиз Телебаев лайиһә даирисидә әмәлгә ашурулидиған ишлар тоғрилиқ өз пикирлири билән ортақлашти. Мәтбуат конференциясидә тәкитләнгинидәк, Дөләт рәһбири «Чон мәмликәт — чоң аилә» лайиһиси тоғрилиқ дәсләпки қетим ҚХАниң ХХІІ сессиясидә билдүргән еди. Һазир у бәш институционал ислаһат даирисидә әмәлгә ашурулуватиду. Җүмлидин бу Милләт планиниң 86-қәдимидә әкис етип, у қазақстанлиқ бирхиллиқни күчәйтиш имканийитини бериду. Шуңлашқиму бу Анатолий Башмаковниң тәкитлишичә, наһайити җиддий, мурәккәп вә наһаийити муһим иш. Учришиш даирисидә шундақла гражданлиқ бирхиллиқниң миллий паспортни елиш биләнла берилмәйдиғанлиғи тәкитләнди. «Қоғамдық келісім» җумһурийәтлик дөләт мәһкимиси мудириниң орунбасари Ғазиз Телебаевниң мошу мәсилигә мунасивәтлик тәкитлишичә, гражданлиқ бирхиллиқ инсан балисиниң Қазақстанни пәқәт яшаш мәмликити сүпитидә әмәс, бәлки өз Вәтини, әҗдатлири дәпин қилинған, уруқ-туққанлири билән йеқинлири яшаватқан вә өз балилириниң келәчигини бағлаштуридиған, һәммидин қәдир тутидиған җай сүпитидә қобул қилишни билдүриду. «Чоң мәмликәт — чоң аилә» лайиһисиниң мәхситиму әйнә шундақ бирхиллиқни шәкилләндүрүштин ибарәт. «Қоғамдық келісім» җумһурийәтлик дөләт мәһкимисиниң мудири Наталья Калашникова ахирқи һесапта һәрбир гражданниң миллитидин вә динидин  қәтъий нәзәр мошу лайиһә арқилиқ «Мәңгүлүк Әл» миллий идеясини тәрәққий әткүзүшкә һәссә қошидиғанлиғини һис қилиши керәклигини қошумчә қилди. Умумән Наталья Калашникованиң тәкитлишичә, бүгүнки таңда «100 ениқ қәдәм» Милләт планини әмәлгә ашуруш даирисидә күн тәртивидә көплигән мәсилиләр туруватиду. — Бу йосунда мән ҚХА даирисидики барлиқ ишниң бәш институционал ислаһатни әмәлгә ашурушқа қаритилғанлиғини ейтқан болар едим. Сөзсизки, ҚХАниң вә униң қурулумлириниң асасий вәзиписи «Чоң мәмликәт — чоң аилә» охшаш әҗайип лайиһини тәрәққий әткүзүштин вә әмәлгә ашуруштин ибарәт, — деди Н.Калашникова. Һазир Ассамблеяниң этномәдәний бирләшмилири вә җәмийәтлик тәшкилатлири өзиниң мошу лайиһини әмәлгә ашуруштики роли вә орнини актив муһакимә қиливатиду. Улар бу һәрикәткә дөләт иҗтимаий шериклиги асасида җәлип қилиниду. Әнди униң мавзу даирисигә кәлсәк, һәрхил пландики чарә-тәдбирләрни әмәлгә ашуруш күтүлмәктә. Наталья Калашникова уларниң бәзи бирлирини атап өтти:  «Қазақ хәлқигә вә бир-биригә миннәтдарлиқ билдүрүш күни», иҗтимаий ярдәм қилиш, Ипәк йолидики сөһбәтләргә бағлиқ чоң лайиһиләрни әмәлгә ашуруш үчүн «Шәпқәт карвини», «Келәчәк үчүн хатирә» әйнә шулар җүмлисидиндур. Умумән жил ахириғичә 12 лайиһә әмәлгә ашурулиду. Бу тизимдики дәсләпки чарә-тәдбир — Медиация мәркизиниң мәҗлиси — 6 — 7-августта өткүзүлиду. Униңда елимиз һәм чәтәллик экспертлар милләтләрара мунасивәтләрни вә қазақстанлиқ бирхиллиқни күчәйтишниң асаси сүпитидә Ассамблеяниң миссиясини йәнә бирқетим муһакимә қилиду.