• Йеңилиқлар
  • 13 Тамыз, 2015

Чоң ишлар күтүп туриду

Өткән шәнбә күни Астанада Президент Нурсултан Назарбаевниң қатнишиши билән «Нур Отан» партияси сәясий кеңиши бюросиниң мәҗлиси болуп өтти. Мәҗлистә Дөләт рәһбири Бауыржан Байбекқа әмәлгә ашурған ишлири үчүн миннәтдарлиқ билдүрди вә партия рәисиниң йеңи биринчи орунбасари Асқар Мырзахметовни тонуштурди.Қазақстан Президенти «Нур Отан» партияси әзалириниң бирлишип иш елип бериши түпәйли униң сайлам алдидики платформисиниң 70 пайизиниң орунланғанлиғини, башқа йөнилишләр бойичә паал иш жүргүзүлүватқанлиғини тәкитлиди. Парламенттики фракция биз әмәлгә ашуруватқан барлиқ программиларниң қанун җәһәттин мустәһкәмлинишини тәминләватиду. Партия гражданлиқ җәмийәт билән кәң диалог орнатти. Униң тәшәббуси билән қурулған «Қазақстан-2050» Умуммиллий демократик күчләр коалицияси җәмийитимизни җипсилаштуруш мәйданиға айланди, бу ишни давамлаштуруш керәк. Партияниң җәмийәтлик қобулханилири аһали билән әкис алақини нәтиҗидарлиқ һалда тәминләватиду. Интернеттики, җүмлидин дәсләпки қетим җарий қилинған «электронлуқ партия» лайиһиси арқилиқ иш күчәйтилди. Шундақла «Жас Отан» яшлар қанитиниң йеңи программисиниң қобул қилиниши түпәйли яшлар билән елип берилидиған ишму йеңи дәриҗигә чиқти, — деди Нурсултан Назарбаев. Дөләт рәһбири пәйдин-пәй мәркәзсизләштүрүш вә вакаләтләрни җай-җайларға бериш шараитида партиядә регионларни башқуруш тәҗрибисигә егә кадрлар зөрүрийитиниң өсүватқанлиғини тәкитлиди. Униңдин ташқири Президент һазирқи вақитта «Нур Отан» партияси алдида наһайити муһим вәзипиләрниң туруватқанлиғини атап көрсәтти. Биринчи вәзипә, қазақстанлиқларни бәш институционал ислаһатларни вә «100 ениқ қәдәм» Милләт планини әмәлгә ашурушқа сәпәрвәрликкә кәлтүрүштин ибарәт. Қазақстан Президенти шундақла «Нұрлы жол» программисини орунлашниң кетип бериши үстидин нәтиҗидарлиқ назарәтни тәминләшниң зөрүр екәнлигини тәкитлиди. Бу вә биз қобул қилған башқа программилар өз вақтида қобул қилинди, уларни чүшәндүрүш зөрүр. «Нұрлы жол» программисини әмәлгә ашурушқа бирқатар чоң карханилар бошитишқа мәҗбур болған адәмләрни җәлип қилиш керәк. Бу барлиқ һакимларниң вәзиписи, униң үчүн ахча бөлүнди, қурулуш вә автомобиль йоллирини, ағриқханиларни, мәктәпләрни, турушлуқ өйләрни, турушлуқ өй-коммунал егилиги объектлирини қошуп һесаплиғанда һәммә җайда иш бар, — дәп тәкитлиди Дөләт рәһбири вә партияниң җәмийәттә бирлик һәм разимәнликни сақлашқа ярдәм қилиши, аһали билән паал ишлиши керәклигигә диққәт ағдурди. Униңдин ташқири Қазақстан Президенти партияниң һазирниң өзидила келәр жили хелә мурәккәп ихтисадий шараитта өтидиған Парламент сайлимиға тәйярлиқ көрүшни башлаш лазимлиғини атап көрсәтти, Ахирида Дөләт рәһбири Асқар Мырзахметовниң ишиға утуқ тиләп, Президент Мәмурийити, Һөкүмәт, «Нур Отан» партияси вә униң Парламенттики фракциялириниң җипсилиқта ишлиши керәклигини тәкитлиди.

281 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы