• Әхбаратлар еқими
• 03 Қыркүйек, 2015

Конституция күни нишанланди

Мәлумки, Қазақстан Җумһурийитиниң Конституциясидә елимиз өзини демократик, зайирлик, һоқуқ вә иҗтимаий дөләт дәп елан қилинип,  униң алий қәдрийәтлири инсан, униң һаяти, һоқуқлири вә әркинлиги дәп  көрситилгән. Әйнә шу Конституциягә мувапиқ, елимиз турақлиқ тәрәққий етиватиду. Аһалисиниң иҗтимаий турмуши күндин-күнгә яхшилиниватқан Әмгәкчиқазақ наһийәсидиму еғиз толтуруп ейтарлиқ өзгиришләр бар. Барлиқ қазақстанлиқларниң әркин һаятини, билим елишини, әмгәк қилишини капаләтләндүргән Асасий Қанунниң 20 жиллиғи  Ишиктә шәһиридики наһийәлик Мәдәнийәт өйидә тәнтәнилик  нишанланди. Дөләт Гимни орунланғандин кейин мәрасимни наһийә һакими Бинәли Ысқақ ачти. У наһийә турғунлирини мустәқиллигимизни чиңитип, турмушумизни яхшилап, ярқин келәчәккә йетиш үчүн мүмкинчиликләр яритип, елимизни дунияға тонутуватқан Конституциямиз күни билән сәмимий тәбрикләп, хатирҗәмлик, бәрикәт вә ишлириға утуқ тилиди. Наһийә тәрәққиятиға салмақлиқ һәссисини қошуп келиватқан бирқатар шәхсләргә мукапатларни тапшурди. Атап ейтқанда, 15 адәм «Әмгәкчиқазақ наһийәсиниң Пәхрий граждини» аталса, 12 адәм наһийә һакиминиң Пәхрий ярлиғиға егә болди. Қазақстан Җумһурийитиниң Президенти Нурсултан Назарбаевниң Пәрманиға бенаән 5 адәм «Қазақстан Конституциясына 20 жыл» бәлгүси вә 40 адәм «Қазақстан Конституциясына 20 жыл» тәвәллудлуқ медали билән мукапатланди. Җүмлидин миллитимиз вәкиллиридин наһийәлик ички сәясәт бөлүминиң башлиғи Мөмүнҗан Исламов, Тәшкәнсаз йеза округиниң һакими Мәһәмәтҗан Султанияров вә Әмгәкчиқазақ наһийәлик мәслиһәтниң депутати, «Шелек-Болашақ» ҖЧЙ мудири Аблеким Сәйдуллаев тәвәллудлуқ медальлар билән тәғдирләнди.

Рашидәм РӘҺМАНОВА.

Әмгәкчиқазақ наһийәси.