• Йеңилиқлар
• 03 Қыркүйек, 2015

Алақиларни күчәйтидиған йеңи қәдәмләр

Өткән чаршәнбә күни Дөләт рәһбири Нурсултан Назарбаев елимизгә рәсмий сәпәр билән кәлгән Пакстан Ислам Җумһурийитиниң Премьер-Министри Наваз Шариф билән учрашти. Учришишта сода-ихтисадий, транспорт-транзитлиқ, илмий-техникилиқ вә мәдәний-гуманитарлиқ саһалардики иккитәрәплимә һәмкарлиқни күчәйтиш мәсилилири муһакимә қилинди. Шундақла хәлиқара күн тәртивидики әһмийәтлик вақиәләр һәққидә сөз қозғалди.Учришиш давамида Қазақстан Президенти Пакстанниң системилиқ тәрәққиятида Наваз Шарифниң атқурған ролини тәкитлиди. «Сиз еғир әһвалда дөләттә ихтисадий вә сәясий ислаһатларни утуқлуқ әмәлгә ашуруп, Пакстанниң абройи билән ролини көтиридиған хәлиқара сәясәт жүргүзүватисиз. Қазақстан билән Пакстанниң орунлашқан регионниң дөләтлири өзара сода вә мәдәний мунасивәтләр турғусидин дайим зич мунасивәттә болуватиду. Илгириму Сиз бизниң сабиқ пайтәхтимиз Алмутиға кәлгән едиңиз. Шуниңдин бери аз вақит ичидә биз йеңи пайтәхт салдуқ. Бу шәһәр — бизниң мустәқиллигимиз билән елимиз мустәқиллик жиллирида йәткән утуқлириниң рәмзи», деди Дөләт рәһбири. Өз новитидә Наваз Шариф Нурсултан Назарбаевқа Қазақстанға тәклип қилғанлиғи үчүн тәшәккүр изһар қилип, икки хәлиқниң мунасивәтлириниң тарихи бар екәнлигини тәкитлиди. Иккитәрәплимә учришиштин кейин Қазақстан Президенти билән Пакстан Премьер-Министри кәңәйтилгән тәркиптә өткән музакириләргә қатнашти. У йәрдә Қазақстан Президенти өз сөзидә Наваз Шарифниң сәпири иккитәрәплимә мунасивәтләрни җанландурушқа йеңи сүръәт беридиғанлиғиға ишәнчә билдүрди.