• Йеңилиқлар
• 03 Қыркүйек, 2015

Алаһидә вақиә екәнлигини тәкитлиди

Президент Нурсултан Назарбаев космонавт Айдын Айымбетов билән телефон арқилиқ сөзләшти, дәп хәвәрлиди Президентниң мәтбуат хизмити. Дөләт рәһбири сөһбәт давамида А.Айымбетовниң космосқа сәпири вәтәнлик космос саһасиниң тәрәққий етишиға сүръәт беридиғанлиғини вә Қазақстанниң хәлиқара мәйдандики имиджини күчәйтишкә хизмәт қилидиған муһим вақиә екәнлигини тәкитлиди.А.Айымбетов ишәнчә билдүргини үчүн Дөләт рәһбиригә тәшәккүр изһар қилди вә учушқа тәйяр екәнлигини ейтти. Сөһбәт ахирида Қазақстан Президенти космонавтниң Хәлиқара космос станциясигә болидиған сәпиригә утуқ тилиди вә униң алдиға қоюлған барлиқ вәзипиләрниң орунлишиға тиләкдашлиқ билдүрди. Чаршәнбә күни тәркивидә қазақстанлиқ космонавт Айдын Айымбетов, россиялик Сергей Волков вә Европа космос агентлиғиниң астронавти Андреас Могенсен бар экипаж «Союз-ФГ» ракета-йәткүзгүчиси «Байқоңур» космодромидин учти. Ракета Астана вақти бойичә саат 10.38да учирилди. Тәкитләш лазимки, буниңдин бираз илгири Қазақстан Җумһурийити Премьер-Министриниң орунбасари Бердыбек Сапарбаев Айдын Айымбетов билән учришип, ЭКСПО-2017 вә Қазақстан хәлқи Ассамблеясиниң байрақлирини тапшурған еди. Шундақла Дөләт рәһбириниң тиләклириниму йәткүзгән. Қазақстанлиқ космонавт билән шундақла Қизилорда вилайитиниң һакими Қырымбек Көшербаев вә дәсләпки қазақстанлиқ космонавт Тохтар Аубакиров учришип, утуқ тилигән. Мәлумки, А.Айымбетов космосқа Қазақстанниң байриғини елип чиқиду. У бу қарарни 2004-жили Қазақстан Президентиниң дөләт рәмзлиригә беғишланған уттур эфир пәйтидә қобул қилған еди. А.Айымбетов Орбитида радиациялик әһвални тәтқиқат қилиш бойичә илмий экспериментларни жүргүзиду, экипаж әзалириниң учушқичә, учуш пәйтидә вә учуштин кейинки мунасивәтлирини тәтқиқ қилиду. Униңдин ташқири у Йәрни мониторинг қилиш бойичә вә экологиялик паҗиәләрни тәтқиқ қилиш бойичә экспериментларни әмәлгә ашуриду. План бойичә А.Айымбетов вә А.Могенсен 12-сентябрьдә йәргә қайтип келиду.