• Акция
• 17 Қыркүйек, 2015

Достлуқ вә разимәнлик» карвини Әмгәкчиқазақ наһийәсидә болди

Мәлумки, йеқинда Дөләт рәһбири Нурсултан Назарбаев Хитай Хәлиқ Җумһурийитидә болуп, муһим һөҗҗәтләрни имзалиди. Җүмлидин Улуқ Ипәк йолиниң сәясий, ихтисадий вә иҗтимаий әһмийити муһакимә қилинди. Қазақстан деңизлар билән муһитлардин жирақ. Бирақ Россия вә Хитай кәби чоң мәмликәтләргә, Европа әллиригә апиридиған Улуқ Ипәк йоли Қазақстан арқилиқ өтиду. Шу сәвәплик «Ғәрбий Хитай – Ғәрбий Европа» автомагистрали селиниватиду. Демәк, йеқин арида хәлиқара мунасивәткә техиму кәң  ечилиду. Әмгәкчиқазақ наһийәсиниң нурғунлиған йезилири Улуқ Ипәк йолиниң бойиға җайлашқан. Байсейит, Лавар, Қаратуруқ, Ачисай, Тәшкәнсу, Бәйдибек би, Палтивай, Ғулҗа охшаш йезиларни болса, әшу селиниватқан йеңи йол қақ йерип өтиду. Тарихтин билимизки, бурун Европидин — Хитайға, Хитайдин Европиға карванлар мошу йол арқилиқ маңған. Мошу һәптидә Хитайниң Шень-Сень өлкисидин чиққан карван Қазақстан чегарисини Қорғас арқилиқ кесип өтүп, Уйғур наһийәсигә, андин Әмгәкчиқазақ наһийәсигә кәлди. Қазақ   ханлиғиниң  550  жиллиғиға беғишланған «Достлуқ вә разимәнлик»  дәп  аталған  б? у карванни Әмгәкчиқазақ вә Уйғур наһийәлириниң чегарисида наһийәлик ички сәясәт бөлүминиң башлиғи Мөмүнҗан Исламов қарши алди. 23 төгә вә 15 ат мингән, бурунқи хитай содигәрлиридәк кийингән 60қа йеқин карван әзаси өтмүшни әсләткини, һәқиқәт. Карван әзалири билән болған учришишларға Қаратуруқ, Қазақстан, Бәйдибек би, Ақши, Балтабай, Тәшкәнсаз, Саймасай вә Бәйтерек йеза округлириниң һакимлири, наһийәлик этномәдәнийәт мәркәзлири, жут җамаәтчилиги қатнашти. Йолға чиққиниға 1 жил болған карванни әмгәкчиқазақлиқлар Бәйтерек йеза округиғичә, йәни хошна Талғир наһийәсиниң чегарисиғичә узитип барди.

Рашидәм РӘҺМАНОВА.

Әмгәкчиқазақ наһийәси.