• Концерт
• 08 Қазан, 2015

Қәлб күйлири яңриди

Йеқинда Алмутидики «Алатав» мәдәнийәт өйидә «Аламәт» продюсерлик мәркизиниң қурулғиниға бәш жил толуши мунасивити билән «Қәлб күйлири» намлиқ концерт өтти вә у ҚХАниң 20 жиллиғиға беғишланди. Концерт шинҗаңлиқ иҗрачи Ғәйрәт Ибраһимниң нахшилири билән башланди. Шуниңдин кейин новәт Нуралим Варисов билән Рустәм Ниязовқа берилди. Улар ғулҗилиқ кәсипдиши билән бирликтә «Өмүр», «Дуния бу» нахшилирини жуқури дәриҗидә орунлап, тамашибинлар қәлбидин алаһидә орун алди.  «Аламәт» продюсерлиқ мәркизиниң бәш жиллиғини тәбриклигән «Дияр» топи, Зулпиқар Зайитов, Нариман Һаширов, Рәззам Мамутов, Ихтияр Рәҗәпов, «Таҗиниса» уссул ансамбли, «Азадә» уссул ансамбли «қуруқ қол» кәлмигәнлигини йеқимлиқ нахша-сазлири, әвришим уссуллири билән көрсәтти. Концертниң ахирида җумһурийәтлик Уйғур этномәдәнийәт мәркизиниң иҗраий мудири Зихруллам Қурванбақиев вә «Уйғур авази» гезитиниң баш муһәррири Ершат Әсмәтов сөзгә чиқип, тамашибинлар қәлбигә йол тепишни билидиған талант егиси Қәлбинур Арупни, миллий сәнъитимизниң юлтузи Ғәйрәт Ибраһимни бүгүнки утуғи билән тәбрикләп, уларға  иҗадий утуқ тилиди.

Фируза  НӘВИРДИНОВА.

Алмута шәһири.