• Әхбаратлар еқими
• 05 Қараша, 2015

Өсмүрләр күч синашти

Өткән шәнбә-йәкшәнбә күнлири Талғир наһийәсидики Қизил Туғ оттура мәктивидә йеза яшлирини спорт дуниясиға йетәклигән мәшиқләндүргүчи Әркин Шаевниң уюштуруши билән ушу-саньда бойичә Қазақ ханлиғиниң 550 жиллиғиға беғишланған спорт мусабиқиси болуп өтти. Униңға Алмута вилайитиниң Панфилов, Уйғур наһийәлиридин кәлгән өсмүрләр билән җәнубий пайтәхттики «Нийәт» спорт клубиниң әзалири қатнашти.Мәлумки, һазир өсмүрләрниң сағлам һаят тәризини қелиплаштурушқа, болупму спортниң йәкму-йәк түрлиригә болған қизиқиши хелила үстүн. Әнди уларниң чоң спортта өз қабилийәтлирини намайиш қилишида вә жуқури дәриҗилик мукапатларға қол йәткүзүшидә мошундақ төвәнки балдақ мусабиқилириниң роли алаһидә. Шундақ екән, биз гәп қиливатқан күч синаш кәң даирилик болмисиму, у яш спортчилар үчүн муһим әһмийәткә егә болди. Чүнки уларниң арисида дәсләпки қетим рингқа чиққанлар аз әмәс еди. Яш спортчиларни Йүсүп Вәлиев билән Мурат Ибрагимов (Яркәнт), Виждан Узарбеков, Райлин Ризайдин, Толик Сопиев, Үмүтҗан Рәхмитуллаев (Уйғур наһийәси) вә Имәрҗан Идиллаев («Нийәт» спорт клуби) қатарлиқ устазлири елип кәпту. Өз новитидә, уларниң шагиртлири икки күн давамида һәрхил салмақ дәриҗилири бойичә өзара күч синишип, немигә қабил екәнлигини көрсәтти. Мусабиқә ахирида спортчилар маһаритини баһалиған қазилар Әркин Шаев билән Имәрҗан Идиллаев ғалип чиққанларға Пәхрий ярлиқ вә медальларни тапшурди.

Мәшүр САСИҚОВ.

Талғир наһийәси.