• Йеңилиқлар
• 05 Қараша, 2015

Қазақстан — Бүйүк Британия: пайдилиқ шерикликниң йеңи дәриҗиси

Қазақстан Президенти Нурсултан Назарбаев Бүйүк Британия вә Шималий Ирландия Бирләшкән Корольлуғида рәсмий сәпәрдә болуватиду. Нурсултан Назарбаев рәсмий сәпириниң программиси Астана вә Лондон оттурисидики стратегиялик шерикликни чоңқурлитишқа нишан қилинған. Бу йәрдә у Бүйүк Британия Премьер-Министри Дэвид Кэмерон билән музакириләрни өткүзди. Учришиш давамида Қазақстан — Британия һәмкарлиғиниң асасий йөнилишлири муһакимә қилинди. Дөләт рәһбири Дэвид Кэмеронниң 2013-жили Қазақстанға қилған сәпириниң иккитәрәплимә мунасивәтләрниң күчийишигә яхши асас яратқанлиғини тәкитлиди. Нурсултан Назарбаев болуп өткән музакириләр давамида Қазақстан Һөкүмити әзалириниң Британия тәрәп билән бирқатар муһим келишимләрни қолға кәлтүргәнлигини атап көрсәтти. Президент шундақла Бүйүк Британия Премьер-Министрини кейинки Парламент сайлимида ишәшлик ғалибийәт қазиниши вә йеңи һөкүмәтни қуруши билән тәбриклиди. Силәрниң мәмликитиңлар мошу мурәккәп вақитта қолға кәлтүргән утуқларни тилға алғум келиду. Мениң сәпирим программисиниң зич болуши мунасивәтлиримизниң жуқури дәриҗидә екәнлигини испатлайду, — деди Қазақстан Президенти. Өз новитидә Дэвид Кэмерон Қазақстанниң инвестицияләрни җәлип қилиш, индустрия вә содини тәрәққий әткүзүш саһалирида әҗайип утуқларни қолға кәлтүргәнлигигә диққәт ағдурди. Бүйүк Британия Премьер-Министри мәмликәтлиримизниң өзара музакириләр өткүзидиған мәсилиләр даирисиниң кәң екәнлигини тилға алди вә Нурсултан Назарбаев тәклип қилған ислаһатларни әмәлгә ашурушни муһакимә қилиш нийитидә екәнлигини билдүрди. Музакириләр йәкүни бойичә бирқатар иккитәрәплимә һөҗҗәтләр, җүмлидин Бүйүк Британия вә Шималий Ирландия Бирләшкән Корольлуғи оттурисидики өзара һоқуқ ярдими тоғрилиқ шәртнамә, Қазақстан Җумһурийитиниң Дөләт хизмити ишлири вә коррупциягә қарши күришиш агентлиғи билән Бүйүк Британия Министрлар кабинетиниң кативати оттурисидики өзара чүшәнчә тоғрилиқ меморандум, Бүйүк Британия вә Шималий Ирландия Бирләшкән Корольлуғиниң «ЭКСПО-2017»  көргәзмисигә қатнишиши тоғрилиқ келишим имзаланди. Учришиш ахирида Қазақстан Президенти Бүйүк Британия Премьер-Министрини І дәриҗилик «Достық» ордени билән мукапатлиди. Андин кейин Нурсултан Назарбаев вә Дэвид Кэмеронниң қатнишиши билән Сода-ихтисадий һәмкарлиқ бойичә Қазақстан — Британия һөкүмәтләрара комиссиясиниң мәҗлиси болуп өтти. Нурсултан Назарбаев мәҗлисни ечиш мәрасимида сөзгә чиқип, униңға қатнашқучиларға мустәқил Қазақстанниң шәкиллиниш тарихи һәм һазир мәмликәттә жүргүзүлүватқан ихтисадий сәясәт тоғрилиқ сөзләп бәрди. У Қазақстан чегарилириниң узунлуғиниң һәм униң мәйданиниң чоңлуғиниң Евразия кәңлигидә транспорт-логистикилиқ вәзипини орунлаш имканийитини беридиғанлиғиға диққәт ағдурди. Дөләт рәһбири мустәқиллик жиллиридики ихтисадий тәрәққият сүръитигиму тохталди. Мошу жилларда умумий ички мәһсулат аһалиниң җан бешиға чеқип һесаплиғанда 700 доллардин 13 миң долларға йәтти. Бу биз үчүн чоң утуқ, дәп һесаплаймиз, — деди Нурсултан Назарбаев вә 90-жилларда Қазақстанниң миқияси һәм илдамлиғи бойичә мисли көрүлмигән хусусийлаштурушни утуқлуқ әмәлгә ашуралиғанлиғини әслитип өтти. Президент шундақла Бүйүк Британияниң «ЭКСПО-2017» көргәзмисигә қатнишидиғанлиғи тоғрилиқ келишимниң имзаланғанлиғини жуқури баһалиди вә «Астана» хәлиқара малийә мәркизини қуруш планлири тоғрилиқ хәвәр қилип, Британия ширкәтлириниң мошу лайиһигә қатнишишиниң муһим екәнлигини тәкитлиди. Нурсултан Назарбаев форум қатнашқучилириға мураҗиәт қилип, Қазақстан инвестицияни җәлип қилиш, индустрияләштүрүш программисини әмәлгә ашуруш, шундақла «Йеңи Ипәк йоли» лайиһисигә қатнишиш үчүн көрүватқан чариләргә тәпсилий тохталди. Ахирида Президент Британия ширкәтлирини бирләшкән лайиһиләргә қатнишишқа чақирди. Дөләт рәһбири Бүйүк Британиягә қилған рәсмий сәпириниң биринчи күни шундақла мошу мәмликәтниң йетәкчи тиҗарәтчилири билән бирқатар учришишларни өткүзди.