• Йеңилиқлар
• 19 Қараша, 2015

«Татлиқҗанлар» финалға йол тутти

Йәкшәнбә күни җәнубий пәйтәхттики «Қазақконцерт» залида  «Инайәт» ассоциациясиниң қоллап-қувәтлиши билән «Хушхойлар вә тапқурлар клубиниң» командиларни финаллиқ мусабиқиға таллаш оюни болуп өтти. Уни мәзкүр оюнниң уюштурғучиси һәм жүргүзгүчиси Һаким Тохтахунов киришмә сөз билән ечип, командиларни сәһнигә тәклип қилди вә бүгүнки мусабиқиниң адил қазилири билән тонуштурди.Мусабиқиға бәш команда, йәни «Бесағаш – cіty», «Хапа болма», «Допиңиздин өргиләй», «Лагман.com» вә «Татлиқҗанлар» командилири қатнашти. Бу қетимқи оюн студентлар күнигә беғишлинип, қатнашқучилар мошу мавзу әтрапида өз һүнәрлирини көрситип, төрт басқуч бойичә өзара күч синашти. Мусабиқә давамида бир команда оюндин чиқиши керәк еди. Шуңлашқа қазиларниң баһаси бойичә әң аз пай топлиған «Бесағаш – cіty» финаллиқ басқучқа өтәлмиди. Оюн қаидилиригә мувапиқ, һазирҗаваплиқ вә тапқурлуқлиғи билән көзгә чүшкән  башқа төрт команда  финалда күч синишидиған болди. Тәкитләп өтүш керәкки, өзлириниң һәртәрәплимә қабилийәтлик екәнлигини көрсәткән Заря Восток мәһәллисиниң «Татлиқҗанлар» командиси  әң жуқури пай топлиди. Ахирида қазилар рәиси, «Уйғур авази» гезитиниң баш муһәррири Ершат Әсмәтов сөзгә чиқип, таллавелиш басқучидин өткән командиларни тәбриклиди һәм «Хушхойлар вә тапқурлар клубиниң» әзалириға утуқ тилиди.  Шундақла «Дәрвишләр» топиниң әзаси Райим Һәмраев «Бесағаш – cіty» командисини оюнға паал қатнашқини үчүн Пәхрий ярлиқ билән мукапатлиди. Фируза  НӘВИРДИНОВА. Алмута шәһири.