• Йеңилиқлар
• 19 Қараша, 2015

Хизмитигә мунасип иззити бар еди

Яркәнт — бағри кәң, көпмилләтлик тәвә. Аһалиниң асасий қатлимини тәшкил қилидиған қазақлар билән уйғурлардин ташқири, бу йәрдә қириқтин ошуқ милләт вәкили азәлдин иҗил-инақ яшап келиватиду. Төвәндә гепини қилмақчи болуватқан Ибраһим Нәзәр оғли Тағаев әслидә қериндаш өзбәк миллитигә тәәллуқ болуп, тәғдирниң тәқәзаси билән мошу қедимий жутта туғулуп, биз, уйғурларға сиңишип кәткән еди.Ата-аниси Көктал йезисиға олтирақлишип қелип, мәрһум шу йәрдә 1915-жили дунияға кәлгән екән. Көктал у жиллири Октябрь наһийәсиниң мәркизи еди. Ибраһим йезидики қазақ, уйғур, рус, татар, чечен вә башқа милләт балилири билән қоюқ арилишип, балилиғидин бирнәччә тилни әркин өзләштүрүп өсиду. Мәктәпни пүтириши билән йезидики машина-трактор станциясигә ишқа орунлишип, өзиниң әмгәк паалийитини башлайду. У жиллири педагог-кадрларниң тапчиллиғидин мәктәптә яхши оқуғанлиғи вә рус һәм уйғур тиллирини мукәммәл билидиғанлиғи инавәткә елинип, оқутуш мошу тилларда жүргүзүлидиған мәктәпләрдә муәллим болуп ишлишигә тоғра келиду. 1937-жили һәрбий сәпкә чақиртилип, өз борчини шәрәп билән ада қилиду. Улуқ Вәтән уруши башланғанда Ибраһим Тағаев һәрбий тәртип-интизамни вә қурал-ярақтин пайдилинишни яхши өзләштүргәнлиги үчүн атқучлар взводиниң командири сүпитидә қанлиқ җәңләргә қатнишиду. Бирақ 1944-жили февраль ейида бешидин еғир яридар болуп, иккинчи топтики нака сүпитидә арқа сәпкә қайтурулиду. Мәйдандин көплигән җәңгивар медальлар билән жутиға қайтип кәлгән җәңчини бу йәрдиму көплигән зөрүр ишлар күтүп туратти. Шуңлашқиму мәйдандин келиши биләнла бирдин қизғин әмгәк қойниға арилишип кетиду. Наһийәлик парткомда дәсләп һәрбий бөлүмни, кейинирәк йол қурулуши мәсилилири бойичә бөлүмләрни башқуриду. Умумән, мәйдандин қайтип кәлгәндин кейинки он үч жиллиқ һаяти партия органлирида хизмәт қилиш билән өтиду. Бу вақит җәриянида адәмләр билән ишләшни билидиған, тәшкилий қабилийәткә егә рәһбәр сүпитидә тонулуп, жутдашлириниң сәмимий ишәнчә-етиқатиға сазавәр болиду. Ибраһим Нәзәр оғлиниң 1957-жилидин кейинки әмгәк паалийити кеңәш органлирида хизмәт қилиш билән өтиду. Бираз вақит Көктал йеза кеңишини башқуриду. Андин наһийә билән вилайәт даирисидила әмәс, җумһурийәт бойичиму әң чоң һәм илғар егилик сүпитидә етирап қилинған «Октябрьниң 40 жиллиғи» колхозини өз ичигә алған Орта йеза кеңишиниң рәиси болуп сайлиниду. Әгәр мәзкүр кеңәшниң территориясидә 6500 адәм яшайдиғанлиғини, депутатлар корпусиниң 75 адәмдин ибарәт екәнлигини, 2 мәктәп билән 3 давалаш мәһкимисиниң, 1 интернат, 2 балилар бағчиси, 3 Мәдәнийәт өйи һәм 3 китапхана вә башқиму мәдәний-мәиший нуқтиларниң  болғанлиғини әскә алидиған болсақ, униң рәисигә жүклинидиған җавапкәрчиликниң қанчилик дәриҗидә екәнлигини тәсәввур қиливелиш анчә қийин болмиса керәк. Ибраһим Тағаев аилидиму өз бәхтини тапқан ата еди. Һаятини комсомол вә партия органлирида ишләп өткүзгән Патигүл ана Һәмраева билән 1944-жили аилә қуруп, икки қиз вә бир оғул пәрзәнт көрүведи. Әпсуски, оғли бевақит дуниядин өтти. Мошу күнләрдә икки қизи мәрһум атиси билән анисиниң чириғини өчәрмәстин келиватиду. 1957-жили вапат болған Ибраһим Нәзәр оғлиниң бийил тәвәллудиниң йүз жиллиғи пәрзәнтлири билән қом-қериндашлири вә өз вақтида хизмәтдаш болған жутдашлири арисида атап өтүлди. Бу жутқа әмгиги сиңгән адәмниң исми унтулмайдиғанлиғиниң ярқин испатидур.

Нурәхмәт ӘХМӘТОВ.

Яркәнт шәһири.