• 1-декабрь — Тунҗа Президент күни
• 19 Қараша, 2015

Қәлби хәлиққә йеқин инсан

Қазақстан Җумһурийити өз мустәқиллигини алғандин кейинки барлиқ утуқлар, тәрәққият Президентимиз Нурсултан Әбиш оғли Назарбаевниң исми билән чәмбәрчас бағлиқ. Әлвәттә, мошу жилларда Қазақстанниң бесип өткән йоли дағдам, қийинчилиқларсиз болди дәп ейтишқа болмайду. Болупму елимиз мустәқиллигини алған дәсләпки жиллар һәммимизниң ядида болса керәк. Кеңәш Иттипақи ғулап, барлиқ ихтисадий мунасивәтләр үзүлүп, завод-фабрикилар тохтап, хәлиқ ишсиз қалди. Бир сәясий түзүмдин иккинчи сәясий түзүмгә өтүш дәвриниң барлиқ қийинчилиқлирини баштин өткүздуқ. Нәқ мошу жилларда Қазақстанниң келәчигигә гуман билән қариғанларму көп болди. Бу һәқтә том-том китаплар, мақалилар йезилди. Мана бийил биз Қазақстан мустәқиллигиниң жигирмә төрт жиллиғини нишанлаймиз. Жигирмә төрт жил — бу тарих үчүн һечнемә әмәс. Амма биз елимизниң, хәлқимизниң бесип өткән мошу йолиға нәзәр ташлайдиған болсақ, бир әсиргә йәткидәк ишларни әмәлгә ашурдуқ десәк, мубалиғә болмас. Бүгүнки таңда Қазақстанни пүткүл дуния тонуйду, Тунҗа Президентимиз Нурсултан Назарбаевниң исмини барчә аләм яхши билиду. Мана йеқин арида, 1-декабрьда, биз Қазақстан Җумһурийитиниң Тунҗа Президенти күнини нишанлаймиз. Есиңларда болса, 1991-жили 1-декабрьда пүткүл қазақстанлиқлар өзлириниң Тунҗа Президентини сайлап, ишәнчә билдүрди, әл мустәқиллигини аманәт қилип тапшурди, чоң җавапкәрликни жүклиди. Хәлиқ өз Лидериниң немә қилиш керәклигини билидиғанлиғиға, тоғра йолға башлайдиғанлиғиға ишәнди. Хәлқимизниң шу ишәнчисини Президентимиз толуқ ақлиғанлиғиға һазир көз йәткүзүватимиз. Нурсултан Назарбаев мустәқил дөләтниң мәнпийити, парлақ келәчиги үчүн нәтиҗидар ислаһатларни әмәлгә ашурди. Бу жилларда әмәлгә ашурулған ислаһатлар нәтиҗисидә Қазақстан дунияда тәрәққий әткән 50 дөләтниң қатариға кирди. Әндики мәхситимиз — риқабәткә қабил 30 дөләтниң қатаридин мунасип орун елиш. Бу мәхсәткиму елимиз Президенти рәһбәрлигидә йетимиз дәп ишәшлик ейталаймән. Бәзидә мән өзәмгә «Барлиқ қазақстанлиқларниң өмлүгиниң әң асасий амили немә?» дегән соални қойимән һәм униңға дайим бирдин-бир ениқ җавап тапимән. У — Тунҗа Президентимиз. Униң Қазақстан тарихидиму, шундақла инсанийәт тарихидиму орни алаһидә. Буниңға Президентимизниң бийил 28-сентябрь күни Бирләшкән Милләтләр Тәшкилати Баш ассамблеясиниң 70-сессиясидә сөзлигән нутқи мисал болиду. Нурсултан Назарбаев өз нутқида дунияда йүз бериватқан ихтисадий боһран, қанлиқ тоқунушларниң ақивәтлириниң инсанийәт үчүн нәқәдәр ховуплуқ екәнлигигә тәпсилий тохталди. Әң муһими, бу мәсилиләргә тохтилипла қалмай, уларни һәл қилишниң ениқ тәклиплирини бәрди. Мениңчә болса, бу пәқәт дуниявий лидерларға хас данишмәнлик. Биз дайим Қазақстанниң әң асасий утуғи — у өмлүк, достлуқ, милләтләрара разимәнлик дәп ейтимиз. Бу дуния җамаәтчилиги етирап қилған һәқиқәт. Қазақстандики толерантлиқниң әҗайип моделини пүткүл дуния үлгә сүпитидә пайдилиниватиду. Әлвәттә, бу йөнилиштә беваситә Тунҗа Президентимизниң тәшәббуси билән тәшкил қилинған Қазақстан хәлқи Ассамблеясиниң әмәлгә ашуруватқан ишлири әһмийәтлик. Бийил шәхсән өзәм Қазақ ханлиғиниң 550 жиллиғиға, ҚХАниң вә дөләт Конституциясиниң 20 жиллиғиға һәм Улуқ Ғалибийәтниң 70 жиллиғиға беғишланған Ассамблея тәрипидин уюштурулған чарә-тәдбирләр даирисидә Қазақстанниң көплигән вилайәтлиридә болдум. Мошу сәпәрләр давамида қазақстанлиқларниң келәчәккә болған ишәнчисиниң өз елигә вә өз Президентиға болған муһәббитини йәнә бир қетим байқидим. Тунҗа Президентимиз Нурсултан Назарбаев билән болған учришишларда болса, униң қәлби дайим хәлиққә йеқин екәнлигини һис қилдим.

Шаһимәрдан НУРУМОВ,

ҖУЭМ рәиси, ҚХА кеңишиниң әзаси.