• Әхбаратлар еқими
• 19 Қараша, 2015

Һисдашлиқ билдүрди

Дүшәнбә күни Президент Нурсултан Назарбаев Францияниң Қазақстандики әлчиханисини зиярәт қилип, Парижда йүз бәргән террорлуқ һәрикәттә нурғунлиған бегуна адәмләрниң һалак болуши мунасивити билән тәзийә билдүрди.Дөләт рәһбири бизниң мәмликитимиз вә Франция оттурисидики жуқури мунасивәтләрни, шундақла йеқинда болуп өткән рәсмий сәпири вақтида Қазақстан тәрәпкә билдүргән иззәт-һөрмитини баһалап, пүткүл Қазақстан хәлқиниң намидин тәзийә билдүридиғанлиғини қәйт қилди. Нурсултан Назарбаев Парижда орун алған террорлуқ һуҗумлар ақивитидә нурғунлиған бегуна гражданларниң һалак болғанлиғини тәкитлиди. Мошу матәм күнлиридә биз Франция хәлқи билән  биллә. Бу мәмликәт дуниявий мәдәнийәт вә тарих очақлириниң бири болуп һесаплиниду. Шуңлашқиму мундақ әһвал һәммимизгә еғир тәсир қилди. Бу пәқәт пүткүл инсанийәтни ғәзәпләндүрүп қоймайла, бәлки шундақ һәрикәтләргә қарши күришишкә чақириду, — деди Нурсултан Назарбаев. — Терроризм һечбир милләткә вә динға тәәллуқ әмәс. У умумйүзлүк балаю-апәт. БМТниң йеқинда болуп өткән сессиясидә мән «Ислам терроризмға қарши» форумини чақириш, шундақла мошу апәткә қарши күришишниң дуниявий тармиғини қурушни тәклип қилдим. Өз новитидә Францияниң Қазақстандики Пәвқуладдә вә Толуқ һоқуқлуқ Әлчиси Франсис Этьен мәмликәт Президентиға вә пүткүл Қазақстан хәлқигә һисдашлиқ билдүргәнлиги үчүн тәшәккүр изһар қилди. Дипломатниң тәкитлишичә, зәрдап чәккәнләрниң арисида қазақстанлиқлар йоқ, бирақ онлиған чәтәллик граждан мошу террорлуқ һәрикәтләрниң қурвиниға айланди. Терроризм адәмләрни йә миллитигә, йә ирқиға қарап бөлмәйду, шуңлашқиму Франсис Этьен униңға қарши бирлишип күришиш керәк дәп һесаплайду. Әслитип өтүмизки, террорлуқ һәрикәтләр 14-ноябрьға өтидиған кечиси орун алди. Ахирқи мәлуматларға қариғанда, униңда 130дин ошуқ адәм һалак болди.