• Хәйрихаһлиқ
• 26 Қараша, 2015

Меһриван жүрәкләрниң һисдашлиғи

Бала – бизниң байлиғимиз һәм бәхтимиз. Һаятимизниң сөлитиму шу балилар болғанлиқтин, пәрзәнтлиримизниң дунияға тәл-төкүз келип, сақ-саламәт чоң болушини арман қилимиз. Уларни худди гүл кәби, пәрвиш қилишқа тиришимиз. Һаяттики әң алий арзу-арманлиримизни шулар билән бағлаштуримиз. Әмгәкчиқазақ наһийәси Қаратуруқ йезисиниң турғунлири Адилҗан вә Толқын Сәйдуллаевларниңму тилиги шу еди. Уларниң икки пәрзәнди — Анеля билән Радмир — ата-анисини шатлиққа бөләп өсүвататти. Бирақ, күнләрниң биридә балиларниң кичиги, 2012-жили туғулған үч айлиқ Радмир өз-өзидинла чөчүйдиған адәт чиқарди. Пәрзәндиниң әһвалидин тәшвишләнгән ата-ана оғлини дәрһал Алмутидики диагностика мәркизигә апириду. Радмирға «Судорожный синдром» диагнози қоюлиду. Ата-ана дохтурларниң мәслиһити билән балиға «Депакин» суюқлуғини беришкә башлайду. Бирақ, балиниң әһвали яхшиланмиғанлиқтин, дохтурлар дориниң мөлчәрини көпәйтишкә мәслиһәт бериду. Бир жилдин кейин балиниң ағриғи күчийип, көзлири тутулуп, көрмәй қалиду. Униң әһвали күндин-күнгә начарлишишқа башлайду. Бала аста-аста мағдиридин қелип, ойнап-күлүшниму қойиду. Ахирида иштийи тутулуп, пәқәт ана сүтини истимал қилиш биләнла чәклиниду. Андин униң гемоглобини 40қа чүшүп, тамдәк татирип кетиду. Дохтурлар Радмирни йолланма билән наһийәлик ағриқханиға әвәтиду. Қаратуруқтин Ишиктә шәһиригә йәткичә балиниң гемоглобини 23кә төвәнләп, мейисигә қан қуюлуп, бала әс-һошини йоқитиду. – Ағриқханида пәрзәнтдимизниң әһвалини көргән дохтурлар «Балиниң жүриги бир-икки һәптигичә өз паалийитини тохтитиду. Уни өйгә елип кетиңлар», деди. Толқын иккимиз  немә қиларимизни билмәй қалдуқ. Бирақ Радмирни өлүмгә қийғумиз, үмүтимизни үзгимиз кәлмиди. Дохтурларниң балимизға йәниму қаришини ялвуруп илтимас қилдуқ. Бәхтимизгә яриша, бу йәрдә жуқури категориялик анестезиолог-реаниматолог Рустәм Идрисовни йолуқтурдуқ. Рустәм ака һәқиқий врачларға хас  җанпидалиқ көрсәтти. Балимизниң өлүмдин аман қелиши шәхсән шу алийҗанап акимизниң әмгиги дәп билимиз, – дәйду Радмирниң атиси Адилҗан. Қошумчә қилиш керәкки, Рустәм Идрисов – медицина саһасиниң ветерани, Челәк наһийәлик мәркизий ағриқханиси баш дохтуриниң сабиқ орунбасари Камил Идрисовниң оғли болуп, Әмгәкчиқазақ наһийәлик ағриқханиниң реанимация бөлүмидә үнүмлүк әмгәк қилип келиватқан яш хирург. Адилҗан билән Толқынниң ейтқинидәк, Рустәм Камил оғли Радмирниң кесилини ениқлаш үчүн балини җиддий тәкшүрүштин өткүзиду. Мәлум болушичә, балиға берилгән дора мөлчәри артуқ болуп, бала организми еғир зәхмиләнгән екән. Шундақла Радмирниң бешида бәз болуп, уму бала саламәтлигиниң начарлишишиға елип кәлгән. Шу күндин башлап Толқын балиға дора бериштин баш тартип, икки яшлиқ Радмирға барлиқ тамақни еғизида чайнап берип, қошуқ билән шорпа ичкүзүшкә башлайду. У барлиқ күч-қувитини оғлиға беғишлап келиватиду. Ана меһри һәммидин күчлүк әмәсму! Һазир Радмирниң әһвали бирқәдәр яхшиланди. Аста-аста у ушшақ тоғралған тамақни өзи йәйдиған болди. Тамақниң дәмини айрип, тетип қалғинини йәнә сорайду. Тәһийиләргә йөләп қойса, олтирип әтраптикиләрни тиңшайду.  Көзи көрмисиму, тивиш чиққан тәрәпкә бурулиду. Әнди балиниң бешидики бәзни елип ташлаш керәк. Адилҗанму вақитни бекар өткүзмәй, Интернет тори арқилиқ балисиға ярдәм издәйду. Мундақ операция чәт әлләрдә ясилип, кам дегәндә 25 миң АҚШ доллири туридекән. Уни йезида жиғиш мүмкин әмәс. Шу сәвәптин Адилҗан Қаратуруқ йезилиқ Уйғур этномәдәнийәт мәркизи шөбисиниң рәиси Бүвинур Ғоҗәмбәрдиеваға йолуқуп, әһвални чүшәндүриду. Бүвинур һәдә наһийәлик Уйғур этномәдәнийәт мәркизигә мураҗиәт қилип, җамаәтчилик ишларниң активистлири, Радмирниң аилиси билән келишип, гезит арқилиқ хәлиққә мураҗиәт қилишни, Радмирни қоллап-қувәтләш мәхситидә хәйрихаһлиқ концертлирини уюштурушни тәклип қилиду. Шундақ қилип, Радмирни қоллап-қувәтләшкә беғишланған «Меһриван жүрәкләр» намлиқ чоң хәйрихаһлиқ концерти Әмгәкчиқазақ наһийәлик Уйғур этномәдәнийәт мәркизиниң уюштуруши вә Әмгәкчиқазақ наһийәлик һакимийәтниң һәм җумһурийәтлик Уйғур этномәдәнийәт мәркизиниң қоллап-қувәтлиши билән 19-ноябрь күни Қаратуруқ йезисидики «Айша» кафесида вә 22-ноябрь күни Челәк йезисиниң Мәдәнийәт өйидә өтти. «Хәйрихаһлиқ – инсанниң есил хисләтлириниң бири. Барлиқ инсан қуяш кәби өзиниң әтрапидикиләргә нурини чечип, пүтүн дунияға яхши тиләклирини беғишлиса, муһтаҗларға қол учини созса, қанчиму инсанни бәхитлик қилалатти» дегән сөзләр билән мәзкүр чарә-тәдбирни башлиған Челәктики хәйрихаһлиқ концертиниң риясәтчилири Рустәм Тайиров билән Җөһәрбүви Гайитова дәсләпки сөзни наһийәлик Уйғур этномәдәнийәт мәркизиниң муавин рәиси Айнисәм Вайденоваға, Челәк йезисиниң чоң жигитбеши Мәһәмәтҗан Савутовқа вә Қорам йезисиниң жигитбеши Қурванҗан Исламовқа бәрди. Натиқлар Радмирниң ялғуз әмәслигини, башқиниң дәрдигә дәрман болалайдиған сахавәтлик әзимәтләрниң аримизда нурғунлиғини, «көп түкәрсә, көл болидиғинини» ейтип, өзлириниң, шундақла өзлири истиқамәт қиливатқан жутлардики жутдашлириниң салимини Сәйдуллаевлар аилисигә йәткүзди. Радмирни қоллап-қувәтләштә пааллиқ тонутқан жут адәмлирини атап, жиғилған мәбләғни ахча топлаш ящигиға салди. Концерт өткән күни Мәдәнийәт өйиниң зали лиқ толуп, өрә турғучиларму аз болмиди. Бу Радмирниң дәрдигә болған һисдашлиқниң испати, әлвәттә. Радмирға саламәтлик тиләп кәлгән сәнъәткарларму нурғун болди. «Тәңритағ» (Маливай йезиси) миллий чалғу әсваплар ансамбли, хәлиқ талантлири Абликим Турсун, Саида Фурқәт, Селимҗан Җалалдинов, Наргиза Әмәтова, П.Чайковский намидики колледжниң студентлири Михрат вә Бәкзат, Қалбүби Ысқақова, Ринат Өтепов вә башқиларниң орунлишидики нахша, уссулларму тамашибинларниң зор алқишиға сазавәр болди. Шуни қошумчә қилиш лазимки, сәһнигә чиққан сәһнә маһирлири Қәлбинур Аруп рәһбәрлигидики «Аламәт» продюсерлиқ мәркизиниң «Азадә» уссулчи қизлар ансамбли, Сәһәрдин Йүсүпов рәһбәрлигидики «Азия плюс Records» студиясиниң талантлиқ яшлириму концертниң қизиқ вә тәсирлик өтүшини тәминлиди. Қаратуруқ вә Челәк йезилирида өткән концертлардин, жутлардин чүшкән 355 миң тәңгә Радмирниң һесап-чотиға авдурулди. Қаратуруқ вә Челәк йезилирида еғир ағриққа муптила болған Радмирни қоллап-қувәтләш мәхситигә өткүзүлгән хәйрихаһлиқ концерт җумһурийәтлик Уйғур этномәдәнийәт мәркизиниң қоллап-қувәтлиши билән 1-декабрь күни Қ.Ғоҗамияров намидики җумһурийәтлик дөләт Уйғур музыкилиқ комедия театрида давамлишиду. Шундақла 16-декабрь күни Студентлар сарийида өтидиған «Шавкәт-шоу» театриниң 20 җиллиғиға тәвәллудиға беғишланған концерттин чүшкән мәбләғниң 30 пайизи Радмир оғлумизға бөлүнидиғанлиғини сахавәтлик инсанларниң диққитигә йәткүзмәкчимиз. Вақит тамамән аз. Алла тилигинидәк, бир-биримизгә меһир-шәпқәтлик болайли, қериндашлар! Рашидәм РӘҺМАНОВА. Әмгәкчиқазақ наһийәси. Радмирға маддий җәһәттин ярдәм қолини сунуп, униң һаятини сақлап қелиш хаһишини бүлдүридиған мәрт-мәрданә, сахавәтлик инсанлар болса, униң һесап-чоти төвәндикичә: ИИК   KZ9192619014SR142000 Сайдуллаев Адилҗан Зунунбекович ИИН 840414300957 KZKOKZKXБИК   KZKOKZKX Алақә бағлаш телефонлири: 8-778-426-20-92, 8-707-877-20-56. СҮРӘТТӘ: Радмирниң бовиси һәм момиси көпчиликкә миннәтдарлиғини изһар қиливатқан пәйти.