• 1-декабрь — Тунҗа Президент күни
• 26 Қараша, 2015

Елимиздики шанлиқ сәнә

Қазақстан Җумһурийити Тунҗа Президенти Күни – мустәқил дөләтниң вуҗутқа келиш тарихини, униң аз вақитниң ичидә тәрәққиятниң барлиқ йөнилишлири бойичә мисли көрүлмигән утуқ-муваппәқийәтләрни қолға кәлтүргәнлигини намайиш қилидиған шанлиқ сәнә.1991-жилниң 1-декабрь күни дәсләпки умумхәлиқ сайлимида Нурсултан Назарбаев мәмликәт Президенти лавазимиға сайланди. Әнди 16- декабрьда болса, җумһурийәт Алий Кеңиши Қазақстанни мустәқил дөләт дәп елан қилди. Нурсултан Назарбаев мәмликәтни униң тарихидики һәл қилғучи дәвирдә башқурди, дәвир болса, алаһидә сәясий ирадини, лидерлиқ хусусийәтни вә стратегиялик даналиқни тәләп қилди. Шу чағда Тунҗа Президент мәмликәт тәрәққиятиниң узақ муддәтлик стратегиялик мәхсәтлирини бәлгүлиди, униң дунияниң геосәясий хәритисидики орни вә әһмийитини ениқлиди, бу болса, мәмликәтни сәясий, ихтисадий вә иҗтимаий йеңилаш үчүн пухта һәм ишәшлик асас-зәмин болди. Мустәқилликниң дәсләпки жиллирида дөләтчиликниң асас селип бәргүчи принциплирини рәсмийләштүргән мустәқил Қазақстанниң биринчи Конституцияси қобул қилинди, җәмийәт һаятиниң барлиқ саһалирида түп-асаслиқ өзгиришләр әмәлгә ашурулуп, улар җумһурийәтниң реал суверенитетини тәминлиди. Әнди 2015-жили апрельда болуп өткән новәттин ташқири Президент сайлимида қолға кәлтүрүлгән ишәшлик ғалибийәт көп милләтлик мәмликәт хәлқиниң Тунҗа Президентиниң паалийитини жуқури баһалайдиғанлиғини, өз Лидерини қоллап-қувәтләйдиғанлиғини ярқин көрсәтти. Дунияда җәмийәт һаятиниң барлиқ саһалирида боһран һадисилири күчийиватқан һазирқи пәйттә җумһурийәт мустәқиллик жиллирида қолға кәлтүргән вә башқиларға яхши үлгә-мисал болуватқан иҗтимаий-сәясий турақлиқ чоң әһмийәткә егә болуватиду. Һәқиқәтәнму Тунҗа Президент жүргүзүватқан сәясий йол дөләттики ички турақлиқни сақлаш һәм мустәһкәмләш, униң аләмшумул дәриҗидә утуқ-муваппәқийәтләрни қолға кәлтүрүши үчүн пухта асас-һул болуп хизмәт қиливатиду десәк, һәргиз ашуруп ейтқанлиқ әмәс. Заманивий дуниядики сәясий вә ихтисадий турақсизлиқларға қаримай, Қазақстан Тунҗа Президентиниң салмақлиқ ташқи сәясий паалийити, истиқбаллиқ геосәясий тәшәббуслири түпәйли хәлиқара сәһнидә етирап қилинди вә чоң аброй-инавәткә еришти. Шуниң нәтиҗисидә дуниядики йетәкчи әлләрниң бизниң мәмликәт билән стратегиялик шериклик мунасивәтләрни орнитишқа болған мәнпийәтдарлиғиму ашмақта. Бу әснада дуниядики йетәкчи сәясәтчиләрниң «Қазақстан – ениқ бәлгүләнгән стратегиялик вәзипиләр асасида турақлиқ вә изчил тәрәққий етиватқан мәмликәт», дәп тәриплиши тәсадипи болмиса керәк. Һәммигә мәлумки, нәқ Нурсултан Назарбаев биринчи болуп евразиялик интеграция идеясини елан қилди. Униң асасини геосәясий вә ихтисадий интеграциялик үлгә тәшкил қилип, һазир бу үлгә Евразия ихтисадий иттипақи даирисидә утуқлуқ әмәлгә ашурулуватиду. Президентниң БМТ Баш Ассамблеясиниң бийилқи юбилейлиқ сессиясидә оттуриға қойған кәң миқияслиқ тәшәббуслири билән тәклиплири дуния җамаәтчилиги тәрипидин қизғин муһакимә қилинмақта. Аләмшумул стратегиялик тәшәббус-2045 плани, «Йеңи келәчәк» концепцияси әйнә шулар җүмлисидиндур. Шу нәрсә диққәткә сазавәрки, Президент ундақ тәшәббусларни оттуриға қоюш билән биллә уларни әмәлгә ашурушқа қатнишиш үчүн Қазақстанниң салмақлиқ сәясий, иҗтимаий-ихтисадий, пән-техникилиқ ихтидарға егә екәнлиги тоғрилиқму билдүрди. Дөләт рәһбири тәклип қилған «Нұрлы жол – келәчәккә башлайдиған йол» вә «Қазақстан-2050» охшаш чоңқур программилиқ һөҗҗәтләрдә мәмликитимиз тәрәққиятиниң нәтиҗидарлиқ ихтисадий принциплири өз әксини тапқан. Нурсултан Әбиш оғлиниң пикричә, индустрияләштүрүш вә ихтисадий тәрәққият җумһурийәтниң, демәк, униң хәлқиниң, иҗтимаий-ихтисадий паравәнлигиниң асаси болуши керәк. Бу әснада мәхсәтчанлиқ характерға егә «100 ениқ қәдәм»  программисиниңму чоң әһмийәткә егә екәнлиги талашсиз. У боһранға қарши чариләр комплексини әмәлгә ашурушта күч-қувәтни бирләштүрүп-җипсилаштуридиған миллий планниң барлиқ пунктлирини әмәлгә ашурушниң ениқ механизмлирини көздә тутиду. Дәрһәқиқәт, ташқи сәясий вә иҗтимаий-ихтисадий турақлиқ  түпәйли мәмликитимиздә җипсилиққа асасланған җәмийәтниң надир үлгиси         шәкилләнди. Қазақстанда 130дин ошуқ милләт вә бирнәччә диний конфессияләрниң вәкиллири течлиқ һәм разимәнликтә яшап, Вәтининиң утуқлуқ тәрәққий етип, дуниядики йетәкчи дөләтләрниң қатаридин орун елиши үчүн билимини, әқил-идригини, күч-қувитини сәпәрвәрликкә кәлтүрмәктә. Уларниң мәдәнийәт-сәнъитини, тил-әдәбиятини, маарип-мәтбуатини тәрәққий әткүзүш үчүн лазим болған барлиқ имканийәт яритилған. 1995-жилдин буян елимиздә Президентниң тәшәббуси билән қурулған Қазақстан хәлқи Ассамблеяси паалийәт елип бериватиду. Бийил 20 жиллиғини нишанлаватқан надир институт түпәйли Қазақстанда яшаватқан барлиқ милләтләрниң вәкиллири Парламентта турақлиқ вакаләтлик қилмақта. Мәмликитимиздә течлиқ вә турақлиқниң, бирлик вә разимәнликниң сақлинишида мәзкүр қурулум бебаһа роль ойнаватиду. Хуласиләп шуни ишәшлик тәкитләшкә әрзийдуки, Дөләт рәһбири Қазақстанни тәрәққият йолида ишәшлик башлап кетип бариду. Һазир пүткүл дуния бизниң мәмликәтни тонуп-билиду. Җумһурийәт Азияниң индустрия-инновациялик мәркизигә айланмақта. Мана мошуниңда Нурсултан Назарбаевниң хизмәт-әҗри бебаһадур. Шуңлашқиму қазақстанлиқлар Тунҗа Президент Күнини Дөләт рәһбириниң әтрапиға техиму җипсилашқан,  барлиқ күч-қувитини у оттуриға қойған аләмшумул тапшурмиларни орунлаш үчүн сәпәрвәрликкә кәлтүрүп, улуғвар мәхсәт-нишанларға йетиш нийитидә нишанлайдиғанлиғи талашсиз. Шөһрәт МӘСИМОВ.