- Әхбаратлар еқими
- 03 Желтоқсан, 2015
«Жасыл ел» нәтиҗилири
мәлумки, 2005-жили Дөләт рәһбири Н.Ә. Назарбаевниң тапшурмиси билән яшларни вәтәнпәрвәрлик билән әмгәксөйгүчлүккә тәрбийиләш, ишсиз яшларни иш билән тәминләш, әтрап-муһитни тазилап, рәткә кәлтүрүш, тәбиәтниң тазилиғини сақлаш, яшларниң бойида тәбиәткә дегән ғәмхорлуқ һис-туйғулирини қелиплаштуруш мәхситидә «Жасыл ел» программиси қобул қилинған еди.Әмгәкчиқазақ наһийәлик һакимийәтниң мәлуматлириға асаслансақ, «Жасыл ел» программиси бойичә наһийәдә 2013-жили 14 яш иш билән тәминләнсә, 2014-жили — 65, бийил 306 қиз-жигит тәбиәт ғәмхорчилириниң қатариға қошулди. Улар наһийәниң һәр округида хәйрихаһлиқ, тазилиқ акциялирини вә шәнбиликләрни уюштурди. Җүмлидин 100дин ошуқ мөтивәрниң өйлиридә болди. Ениғирағи, бир күн бойи йеши 80 — 90дин алқиған мома-бовиларниң өй, һойла-арамини тазилап, отунини йерип, сүйини тошуп бәрди. Ишиктә шәһиридики, Челәк вә Түргүн йезилиридики колледжларниң студентлири билән ишсиз яшлар, умумән, Ишиктә шәһири, Ават, Ақши, Аси, Палтивай, Бәйтерек, Бөлек, Бәйдибек би, Қазақстан, Қаракемер, Көктөбә, Қирбалтабай, Қарийота, Масақ, Раһат, Саймасай, Тәшкәнсаз, Түргүн, Тәшкәнсу, Челәк йеза округлирида миңлиған көчәтләрни олтарғузуп, әтрапни 52 тонна әхләттин тазилиди. Йол бойидики 123 бордюр билән 1056 дәрәқни ақартип, 175 дәрәқни путиди. Мошундақ алийҗанап ишлири билән наһийә яшлири туғулған йеригә болған ғәмхорлуғини намайиш қилип, көпчиликкә үлгә көрсәтти. Яшларниң паалийитидин наһийә турғунлирила әмәс, күч-қувитидин айрилған мөтивәр атилар вә нураний аниларму чәксиз рази. Тәбиәт тазилиғини сақлаш билән биллә яшларни мәвсүмлүк иш билән тәминләватқан «Жасыл ел» программиси наһийәдә йәниму давам қилидиған болиду.
Рашидәм РӘҺМАНОВА.
Әмгәкчиқазақ наһийәси.552 рет
көрсетілді0
пікір