• Билим беғиниң бағвәнлири
• 24 Желтоқсан, 2015

Устаз еқидиси

«Мәктәпниң жүриги — устаз» демәкчи, билим дәргаһида шагиртлар қәлбигә билим нурини сепип келиватқан устазлар нурғун. Шуларниң бири — Маливай йезисидики оттура мәктәптә узун жиллардин бери әмгәк қиливатқан Нәсирдин ака Қурбанов. У йүзлигән шагиртларға билим берипла қоймай, уларниң һаяттин биркишилик орнини тепишида тутқан орни алаһидә. Нәсирдин Қурбанов 1955-жили тарихий Вәтинимизниң Ғулҗа шәһиридә дунияға кәлгән. Атиси Исмайилниң вапатидин кейин 1962-жили  аниси Хатәмхан икки балиси билән Қазақстанға көчүп чиқиду. Қурбановлар аилиси дәсләп Маливай йезисиға орунлишиду вә Нәсирдин шу йезидики оттура мәктәптә билим алиду. Натонуш жутта көплигән қийинчилиқларни баштин кәчүрсиму, Нәсирдин мәктәпни әла баһалар билән пүтирип, 1985-жили ҚазПИниң математика факультетиға оқушқа чүшиду вә униму муваппәқийәтлик тамамлайду. Әмгәк паалийитини Маливай йезисидики мәктәптин башлиған у көп өтмәйла өзиниң кәспигә болған садақитиги, тәләпчанлиғи вә жүкләнгән вәзипилиригә җавапкәрлик билән қариши түпәйли мәктәп мәмурийитини қайил қилиду. Билим бериш саһасида хелила тәҗрибә топлиған Нәсирдин Қурбанов 1995-жили мудирниң оқуш ишлири бойичә орунбасари хизмитигә авуштурулиду вә та мошу күнгичә шу лавазимда хизмәт қилип кәлмәктә. Мәктәп униң иккинчи аилисигә айлинип, өсмүрләрниң билим елиши йолида тинмай әмгәк қилип келиватқан Нәсирдин Қурбанов жут ичидиму алаһидә һөрмәткә сазавәр. Тәкитләш лазимки, көпжиллиқ устазлиқ әмгәк паалийитидә өзиниң тәшәббуси билән қабилийәтлик оқуғучиларниң билимини наһийәлик, вилайәтлик байқаш-көрүкләрдә намайиш қилишиға яр-йөләк болди. Тәдбирчан устазниң әҗри мунасип баһалинип, Қазақстан Җумһурийити Билим вә пән министрлигиниң, Қазақстан хәлқи Ассамблеясиниң Пәхрий ярлиқлири билән мукапатланди. Шуниң билән бирқатарда үнүмлүк иш-паалийити түпәйли «Алий дәриҗилик устаз» дегән пәхрий намиғиму муйәссәр болди. Буниңдин ташқири билим саһасидики тәҗрибиси һәрдайим башқиларға үлгә-ибрәт болуватиду. Мәсилән, 2008-жили Алмута шәһиридики А.Розибақиев намидики 153-мәктәп-гимназиядә өткән «Уйғур тилида билим беридиған мәктәпләрниң тәрәққият стратегияси» намлиқ әнҗуманда оқуған доклади қатнашқучилар тәрипидин қизғин қарши елинди. Бу күнләрдә пүткүл һаятини устазлиқ кәспигә беғишлиған Нәсирдин Қурбановниң өмүрлүк җүпти Пәзиләт һәдә билән аилә қурғиниға оттуз жилға йеқин вақит бопту. Улар һаятниң егиз-пәс даванлирида бир-биригә һәмра болған һалда Рашид вә Саида исимлиқ икки пәрзәндигә пухта билим, аңлиқ тәлим-тәрбийә бәрди. Өз новитидә, һәр иккиси алий билим дәргаһлирини тамамлап, ата-ана еқидисини ақлиди. Пүткүл аңлиқ һаятини мәктәп қойнида, жут хизмитидә өткүзгән Нәсирдин Қурбанов бийил 60 яшлиқ шанлиқ тәвәллудини нишанлаватиду. Мәзмунлуқ һаят вә салмақлиқ әҗри арқилиқ көпчиликниң иззәт-һөрмитигә еришкән Нәсирдин акиға охшаш инсанлар алдида шагиртлири дайим баш егиду. Ундақ инсанларниң  һаяти яш әвлатқа үлгә болидиғанлиғи талашсиз.

Фируза НӘВИРДИНОВА.

Әмгәкчиқазақ наһийәси.