• Йеңилиқлар
• 21 Қаңтар, 2016

Қазақстан Президенти Н.Назарбаевниң 5-қетим сайланған Парламент Мәҗлисини тарқитиш тоғрилиқ Пәрманни имзалишиға, шундақла Қазақстан Җумһурийити Парламенти Мәҗлиси депутатлириниң новәттин ташқири сайлимини бәлгүлишигә бағлиқ хәлиққә Мураҗиити

Мән Парламент Мәҗлиси депутатлириниң вакалитини муддитидин илгири тохтитиш вә йеңи сайламни бәлгүләш тоғрилиқ тәкливини һәртәрәплимә қарап чиқтим. Мошу күнләрдә мениң намимға мәзкүр тәшәббусни қоллап-қувәтләп нурғунлиған хәтләр билән телеграммилар келип чүшүватиду. Сәясий партияләр, кәспий иттипақлар, һөкүмәтлик әмәс тәшкилатлар, карханиларниң, мәһкимиләрниң вә оқуш орунлириниң әмгәк коллективлири новәттин ташқири сайламниң зөрүрлүги тоғрилиқ пикиргә қошулди. Шундақла ветеранлар вә яшлар тәшкилатлири, тиҗарәт, илмий вә иҗадий зиялилар вәкиллири, нурғунлиған айрим гражданларму өзлириниң қоллап-қувәтләйдиғанлиғини билдүрди. Мошу мураҗиәтләрдә кәлтүрүлгән испат-дәлилләр маңа чүшинишлик, уларда мәмликәткә көйүнүш, сәясий кампанияни чапсанирақ аяқлаштуруш вә қоюлған вәзипиләрни әмәлий һәл қилиш зөрүрийити өз әксини тапқан.

Һазир мәмликитимиз мурәккәп сәясий вә ихтисадий җәриянларға җәлип қилинған. Энергия мәнбәлири баһалириниң төвәнлишиши ақивитидә көплигән әлләрни өз ичигә алған ихтисадий боһран пүткүл дуниявий ихтисатқа вә униң аҗралмас қисми сүпитидә бизниң мәмликитимизгә җиддий тәсир қиливатиду. Мошу мурәккәп вақит мәмликәт алдиға наһайити мурәккәп вәзипиләрни вә синақларни қоймақта. Хәлиқара вәзийәтму мурәккәпләшти. Йетәкчи дөләтләр оттурисидики тоқунуш өсүп, уларниң бир-биригә чариләр қоллинип, қарши туруши күчәймәктә. Экспертларниң көпчилиги «соғ мунасивәтләр уруши» аяқлашқан пәйттин тартип дуниявий дөләтләр оттурисидики ихтилаплар һазирқидәк кәскинләшмигән дегән пикирдә йәкдил болуватиду. Бу шараитта регионлуқ тоқунушларниң йеңи очақлири пәйда болмақта. Террорлуқ ховуп күчийиватиду. Қачақларниң аләмшумул долқуни сәйяриниң йеңи-йеңи регионлирини өз ичигә алмақта. Дуниявий сода көләми төвәнләватиду, фонд базарлириниң ғулиши йүз бериватиду. Девальвация дунияниң барлиқ валютилирини дегидәк өз ичигә алди. Мошуниң һәммиси регионлуқ һәм миллий ихтисатларға сәлбий тәсир йәткүзүватиду. Мән хәлиққә йоллиған йеқинқи Мәктүбимдә ейтқан дунияниң йеңи һәққанийити йеқинлишиватиду. Бу хам әшия баһалириниң төвән болуши шараитида яшашни үгинип, индустрияләштүрүшни, кичик вә оттура тиҗарәтни тәрәққий әткүзүшни паал давамлаштурушни билдүриду. Мошу мурәккәп вәзийәттә бизниң һәммимизниң әһвалға қарап яшашни, ресурсларни ихтисат қилишни, иш орнини сақлап қелишни чүшинишимиз муһимдур. Мундақ һәвалда Һөкүмәт вә Парламент бирлишип ишлиши вә оператив чариләрни көрүши керәк. Һәрқачанқидәк хәлқимиз бирлишиши вә мошу мурәккәп вақитта мүмкин болидиған һәрқандақ иғваларға зәрбә бериши, зөрүр болған әһвалда қануний зәрбә бериши лазим. Вәзийәтниң начарлишишини сәясәтләштүрүшкә вә әйипкарларни издәшкә тиришидиғанларғиму зәрбә бериш керәк. Бу һечқандақ мәмликәт, шу җүмлидин Қазақстанму тәсир қилалмайдиған аләмшумул җәриян. Шуңлашқа һәммимиз җипсилишип, бир-биримизгә ярдәм қилишимиз лазим. Һазир мәмликәтниң һәрбир граждининиң вәтәнпәрвәрлиги синақтин өтүватиду. Биздә тәғдиргә амалсиз бойсунидиған, һәммә нәрсә қачанду-бир вақитта өз орниға қайтип келиду, нефть баһаси көтирилиду вә әһвал қандақла қилип болмисун яхшилиниду, дәп үмүт қилишқа вақит йоқ. Һазир һәрқандақ аләмшумул синақларға тохталсиз системилиқ һәм алдин-ала җавап бериш вә тегишлик чариләрни көрүш муһим. Биз «Қазақстан-2050» Стратегияси йолини давамлаштурушимиз, боһранға қарши программини әмәлгә ашурушимиз, Милләт планини орунлишимиз керәк. Миңлиған гражданларға иш берип, «Нұрлы жол» программисини актив әмәлгә ашурушимиз лазим. Һөкүмәт, барлиқ министрлар вә барлиқ дәриҗиләрдики һакимлар хираҗәтләрни қисқартиш, аппаратни оптималлаштуруш резервлирини издиши, өткәнки боһран тәҗрибисини вә инфрақурулумлуқ қурулуш имканийитини пайдилинип, иш орунлирини бериши керәк. Хәлиққә йоллиған Мәктүптә дөләтни, ихтисатни вә җәмийәтни чоңқур йеңилаш, бюджет сәяситини ихтисат, теҗәмлик вә пайда елиш принциплирида оптималлаштуруш бойичә миқияслиқ вәзипиләр қоюлди. Парламентниң һазирқи тәркиви Милләт планиға мувапиқ чоң көләмлик үнүмлүк қанун чиқириш ишини әмәлгә ашурди. Әндики ишни Һөкүмәт  вә мәмликәтниң барлиқ иҗраий органлири, шундақла тиҗарәтчиләр бирләшмиси орунлайду. Бу мәмликәтни дуниявий бирләшмә алдида техиму егиз көтириду, инвестицияләрни җәлип қилиду, мәмликитимизгә болған ишәнчини күчәйтиду. Биз буни әмәлгә ашурушимиз керәк. Һазир җәмийитимиз түрлүк синақ-ховупларға тәйяр. Биз Мустәқилликниң чарәк әсиргә йеқин мунасип йолини бесип өттуқ. Биз бәрпакарлиқ әмгәк арқилиқ тавланған вә утуқлуқ һәм пүткүл дунияда һөрмәт билән тилға елинидиған дөләтни қурған бирпүтүн хәлиқ болдуқ. Мән депутатларниң тәшәббусини Қазақстанниң тәғдиригә вәтәнпәрвәрлик көйүнүшниң көрүнүши сүпитидә қобул қилимән. Новәттин ташқири Мәҗлис сайлимини мәслиһәтләрниң новәттики сайлими билән бир вақитта өткүзүш һәм вақитни, һәм малийә ресурслирини ихтисат қилиш имканийитини бериду. Дөләт мәнпийәтлиригә диққәт бөлгәнлиги вә жуқури тарихий җавапкәрлик көрсәткәнлиги үчүн барлиқ депутатларға тәшәккүр изһар қилимән. Мәмликәт Конституциясиниң тәләплиригә мувапиқ мән Парламент Палатилириниң рәислири, Премьер-Министр вә Конституциялик кеңәш рәиси билән мәслиһәтләрни өткүздүм, уларниң йәкүни бойичә депутатларниң тәшәббусинпи қоллап-қувәтләш қарари қобул қилинди. Һакимийәтниң вакаләтлик тармиғини йеңилашниң мәмликәт вә хәлиқ мәнпийәтлиридә әмәлгә ашурулуватқанлиғиға ишинимән. Сәясий партияләр күн тәртивиниң вәзипилирини чүшинәләйдиған саватлиқ, ишбиләрмән вә мәмликәт мәнпийәтлиригә садиқ намзатларни көрситиши керәк. Бүгүн мән бәшинчи қетим сайланған Парламент Мәҗлисиниң вакалитини муддитидин илгири тохтитиш тоғрилиқ Пәрман имзалидим. Новәттин ташқири Мәҗлис сайлими 2016-жил 20-мартқа бәлгүләнди. Барлиқ қазақстанлиқларға, җәмийәтниң барлиқ иҗтимаий қатламлириға вақит тәләп қилған қарарни қоллап-қувәтләш чақириғи билән мураҗиәт қиливатимән. Һәммиңларни сайламға актив қатнишишқа вә мәмликитимизниң келәчиги үчүн җипсилиғимизни һәм бирлигимизни намайиш қилишқа чақиримән. Конституция капалити сүпитидә Мәркизий сайлам комиссиясигә вә барлиқ вакаләтлик дөләт органлириға алдимиздики сайламниң қанунийлиғини, очуқлуғини һәм адаләтликлигини тәминләшни тапшуримән. Сайлам кампаниясиниң һәм сайламниң мурәккәп басқучта хәлиқни җипсилаштурушқа вә Қазақстанни тәрәққиятниң йеңи пәллилиригә елип чиқишқа ярдәм қилидиғанлиғиға ишинимән. Бизниң һәммимизниң умумий мәхситимиз бир – мәмликәтниң течлиқ-хатирҗәмлиги. Биз һәммимиз Қазақстанниң гүллиниши үчүн әмгәк қиливатимиз вә күч чиқириватимиз. Биз һазирқи вақит пәйда қиливатқан қийинчилиқларни бирлишип йеңәләймиз. Барлиқ қазақстанлиқларни, сәясий партияләрни умумий өйүмизниң тәғдиригә җавапкәрлик билән яндишишқа вә вәтәнпәрвәрлигимизни күчәйтишкә чақиримән. Мустәқилликниң 25 жиллиқ юбилейини бирлигимиз һәм җипсилиғимиз билән қарши алдиғанлиғимизға ишәнчим камил. Алдимизда туруватқан вәзипиләр ениқ, уларни һәл қилишқа киришиш керәк. Астана, Ақорда, 2016-жил 20-январь