• Концерт
• 28 Қаңтар, 2016

Хәйрихаһлиқ — инсанийлиқниң бәлгүси

Өткән йәкшәнбә күни Әмгәкчиқазақ наһийәсиниң уйғурлар зич җайлашқан Азат йезисида мүмкинчилиги чәкләнгән балиларниң тәғдиригә вә келәчигигә дегән җавапкәрчиликни йәнә бир қетим әскә салған хәйрихаһлиқ концерти болуп өтти.– Балилар – бизниң келәчигимиз. Бүгүнки концертимиз йезимиздики туғулушидин һәрқандақ ағриққа муптила болған 9 балиға азду-тола ярдәм қилиш мәхситидә уюштурулуватиду. Алла таала  мәйип  яратқан балиларниң толуқ сақийип кетишигә ярдәм берәлмисәкму, кечә-күндүз шу балиларға қараватқан ата-аниларниң жүкини йеникләтсәк, бираз уларниң көңлини көтәрсәк дәймиз, – дәйду хәйрихаһлиқ акциясини уюштурғучи Рәһимҗан Мусаров. Атап кетиш керәкки, 25 жил паалийәтсиз йепиқ турған йезидики Мәдәнийәт өйи буниңдин икки жил бурун «Азат» ишләпчиқириш кооперативиниң рәиси Иван Поплавский тәрипидин мурәккәп җөндәштин өтти. Шуниңдин бери уни Реһимҗан Мусаров иҗаригә елип, ишлитиватиду. Йезидики һәрқандақ мәдәний  иш-чариләр мошу йәрдә өтүватиду. Шуниму қошумчә қилиш керәкки, Азатта хәйрихаһлиқ чарилири тоғра йолға қоюлған.  Мәсилән, йезидики бирнәччә җәмийәтлик орунға хәйрихаһлиқ ящиклири орнитилған. Булту жиғилған 120 миң тәңгини жут активистлири йезиниң турмуши начар аилилиригә бөлүп берипту. Бийилму муһтаҗ аилиләр тизими түзүлүп, уларниң барлиғини арилап чиқиш, ярдәм көрситиш буниңдин төрт ай бурун сайланған йеңи жигитбеши вә жут активистлириниң иш планиға киргүзүлгән. Реһимҗанниң алийҗанап башланмисини йезиниң сахавәтлик инсанлири толуқ қоллап-қувәтлиди. Концерт өткән күни коча-коча болуп таамлар тәйярлинип, дәстихан йейилди. Мәдәнийәт өйиниң залиму жирақ-йеқиндин кәлгән адәмләргә лиқ толуп, өрә турғучиларму аз болмиди. Бу Азат йезисида, умумән, Рахат йеза округида сахавәтлик инсанларниң нурғун екәнлигиниң бәлгүсидур. Концерт башлиништин бурун сәһнигә йезиниң дайимий һамийи Иван Поплавский, наһийәлик Уйғур этномәдәнийәт мәркизиниң рәиси Сулайман Мәхсүтов, наһийәниң чоң жигитбеши Турсунмәһәмәт Абдусемәтов, Ишиктә регионлуқ Ханим-қизлар кеңишиниң рәиси Нурбүви Насирова тәклип қилинип, улар азатлиқларниң сахавәтлик ишлириға апирин ейтишти вә йеза яшлириниң бешида турған Реһимҗанға утуқ тилиди. Икки саатқа созулған концерт җәриянида тамашибинлар Азатниң Юнус Имиров, Рано Файзуллина, Гүлнарә Һапизова вә Селимәм Ниязова рәһбәрлигидики «Диларам», «Бриллиант», «Dance lіfe» вә «Баһар» ансамбльлириниң, яш сәнъәткарлар Аружан Маметханова, Шатмир Ибрагимов, Мейрамбек Тасжалиевниң, шундақла кәч меһманлири Мехрат Әмәтов, Ават йезисиниң «Баһар» ансамбли, Қуаныш Дархан, Илмурат Үсәнов вә башқиларниң һүниридин бәһримән болди. Концерттин кейин Азат толуқ әмәс оттура мәктивиниң мудири Иврайимҗан Исмәков, йезиниң жигитбеши вә униң орунбасари Сейитҗан Турғанов билән Нурмәһәмәт Әхмәтов, Ханим-қизлар кеңиши рәисиниң орунбасари Модәнгүл Һаширова сәнъәтчиләргә, концертни уюштурғучиларға һәм кәч меһманлириға миннәтдарлиқ билдүрди. Ахирида Реһимҗан Мусаров бир түркүм яш сәнъәткарларға Пәхрий ярлиқларни тапшуруп, бүгүнки  концерттин чүшкән 145 миң тәңгини муһтаҗ аилиләргә  берилидиғанлиғини ейтти. Рашидәм РӘҺМАНОВА. Әмгәкчиқазақ наһийәси. СҮРӘТТӘ: Ю.Имиров (солда) вә Р.Мусаров «Диларам» ансамблиниң  әзалири билән.