• Әхбаратлар еқими
• 18 Ақпан, 2016

Кәспий утуқ нишани

Назарбаев мәркизидә Қазақстан Җумһурийитиниң Тунҗа Президенти – Милләт Лидери Фонди мукапитиниң лауреатлирини – яш мәдәнийәт вә пән әрбаплирини – мукапатлаш мәрасими болуп өтти.Қазақстан Җумһурийитиниң Тунҗа Президенти – Милләт Лидериниң Фонди – 2000-жили Нурсултан Назарбаев тәсис қилған коммерциялик әмәс тәшкилат. У иҗтимаий, хәйрихаһлиқ, мәдәний, маарип вә башқа җәмийәткә пайдилиқ мәхсәтләрни көздә тутиду. Әнди фонд мукапити болса, бу мәдәнийәт вә сәнъәт, пән вә техника саһасидики яш иҗадий хадимларниң утуқлирини етирап қилиш болуп һесаплиниду. 2015-жили конкурсқа мәмликитимизниң җай-җайлиридин йүздин ошуқ намзат көрситилди. Фонд йенидики Яш алимлар кеңиши вә Иҗаткар яшлар кеңишиниң әзалиридин тәркип тапқан экспертлар 21 лауреатни таллавалди.

Фонд мукапитиға еришкәнләрниң арисида Абай намидики Қазақ дөләт академиялик опера вә балет театриниң балет артисти Әлия Сапуғова, «Астана Опера» Опера вә балет театри опера трупписиниң йетәкчи солисти Сүндет Байғожин, Қазақстан Җумһурийити Композиторлар иттипақиниң әзаси Ғалимжан Секеев, Л.Гумилев намидики Евразия миллий университетниң доценти Әсет Қайнарбай, Ботаника вә фитоинтродукция институтиниң илмий хадими, биология пәнлириниң намзити Наталья Курбатова вә башқилар  бар. Лауреатларға мукапатларни атақлиқ сәясәт вә җәмийәт әрбаплири – Қазақстан Җумһурийити Парламенти Сенатиниң депутатлири Бирғаным Әйтимова вә Владимир Редкокашин, Хәлиқ Қәһримани Айдын Айымбетов, «Республиканская газета «Казахстанская правда» акционерлиқ җәмийити башқармисиниң рәиси Александр Тараков, Қазақстанниң хизмәт көрсәткән артисти Ерлан Көкеев вә башқилар тапшурди.