• Йеңилиқлар
• 03 Наурыз, 2016

Анар ана 100гә кирди

Қәлби меһир-шәпқәткә толуп-ташқан аниларниң мәйрими – Хәлиқара аяллар күнидә көктөбилик Анар Абдрахманованиң өйидә меһманларниң айиғи үзүлмәйду. Һә, 8-март униң туғулған күни. Нураний анини тәбрикләп пәрзәнтлири, улардин тариған нәврә-чәврә, әврилири, шундақла жутдашлири келиду. Ана бийил 100 яшқа кирди. Анар Идрис қизи – меһманлириниң барлиғи үчүн қәдирлик. Сәвәви, у дәһшәтлик Улуқ Вәтән уруши жиллири Ғалибийәт үчүн әмгәк қилди. Униңдин кейинки жиллириму егиликләрни тикләш ишлириға әрләрдин қелишмай арилишип, елимизниң тәрәққиятиға өзиниң биркишилик һәссисини қошти. Йүз яшлиқ ана бүгүнму жутдашлириға йол-йоруқ көрситип, дуасини берип, яшларни Вәтәнни сөйүп, миллий қәдрийәтләрни һөрмәтләп, қәдирләшни үгитиштин һарған әмәс. Бүгүнки күндә көпбалилиқ анилар аз. Һәрбир аилидә икки, үч, көп болса бәш бала бар. Анар ана ейтқинидәк, анилар қәйсәрлик көрситип, көпирәк бала тапса, дунияға кәлгән пәрзәнтләрму аста-аста әр йетип, хәлиқ хизмитигә яримамду?! Демәк, аниларниң келәчәк үчүн болған җавапкәрлиги наһайити зор. Шундақ екән, мәйримиңлар мубарәк болсун, әзиз анилар! Анар аниға охшаш меһри – дуния, һаяти – яшларға үлгә-ибрәт анилиримиз узақ яшисун! Уларға қарап инсаплиқ, милләт келәчигини ойлайдиған қизлиримизниң сани көпәйсун!

Рашидәм РӘҺМАНОВА.

Әмгәкчиқазақ наһийәси.