• Йеңилиқлар
  • 10 Наурыз, 2016

Яшларниң ханим-қизларға соғиси

Өткән пәйшәнбә күни Талғир наһийәсиниң Туздыбастав йезисидики Мәдәнийәт өйидә 8-март — Хәлиқара аяллар күнигә беғишланған чоң концерт болуп өтти. Мәзкүр мәйрәмлик чарә-тәдбир бу қетим ушбу жутниң яшлири тәрипидин тәйярланди.Дунияда әң меһриван инсанлар һөрмитигә уюштурулған концертта иҗра қилинған нахша-сазлар һәммиси дегидәк анилар билән момилар вә һәдиләр билән сиңиллар һәққидә болди. Тонулған сақи Шатлиқ Худайқуловниң риясәтчилигидә ханим-қизларға соға сүпитидә өткән концертлиқ программа, уларға һәқиқәтәнму алаһидә хуш кәйпият беғишлиди. Чүнки бу күни исми көпчиликкә яхши тонуш һәм әндила миллий сәнъитимизгә қәдәм ташлиған яш нахшичи-сәнъәткарлар барлиқ һүнирини намайиш қилип, имканқәдәр назук җанларниң көңлини елишқа тиришти. Мәсилән, тонулған сәнъәткарлар Артур Илахунов, Рустәм Ниязов, Җимиләм Әмәтова, Таймир Керимов, Маратҗан Савутов вә туздыбаставлиқ сәнъәткарлар Чинғиз Йолдашев билән Җөһәргүл Сасиқова орунлиған хәлиқ нахшилирини тамашибинлар қизғин қарши алди. Шундақла бу йәргә ХХҖдин кәлгән нахшичи Гүлбаһар Реһимниң (сүрәттә) қәдәм тәшрип қилиши вә аниларға беғишлап бир җүп нахшисини һәдийә қилғанлиғи тамашибинларға һәқиқәтәнму күтүлмигән соға болди. Мәйрәмлик концерт ахирида Талғир наһийәлик Ханим-қизлар кеңишиниң рәиси Арзигүл һаҗим Һошурова, йезилиқ Ханим-қизлар кеңишиниң рәиси Банум Бавдинова вә Яшлар кеңишиниң рәиси Адилҗан Әзизов сәһнигә чиқип, концертни уюштурған Шерияздан Хоҗаевқа миннәтдарлиқ билдүрди. Заманивий музыка әсләһәлирини орунлуқ һәм кәспий дәриҗидә пайдилиниш арқилиқ өткүзүлгән концерт, униң тамашибинлири турмушниң җапа-мәшәқитини тола тартидиған, инсан һаятида муһим роль атқурғучи Аниларниң бир дәқиқә болсиму турмуш һәләкчилигини ядидин чиқирип, хуш кәйпиятқа бөлинишигә түрткә болғанлиғи талашсиз. Мәшүр САСИҚОВ. Талғир наһийәси.

453 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы