• Йеңилиқлар
  • 17 Наурыз, 2016

Чегаридики сода мәркизи

Дүшәнбә күни Премьер-Министрниң орунбасари Бақытжан Сағынтаев Алмута вилайитидә иш бабидики сәпәрдә болуп, Панфилов наһийәсидики «Қорғас» Хәлиқара чегара йенидики һәмкарлиқ мәркизини (ХЧҺМ) зиярәт қилди. У ХЧҺМниң Қазақстан вә Хитай қисимлирини көздин кәчүргәндин кейин, чегаридики тәкшүрүш-өткүзүш пунктлирини тонуштурушқа қатнашти.

Мәркәзни зиярәт қилғучилар үчүн 30 күнлүк визисиз тәртип көздә тутулған. Бу йәрдә сода өйлири ечилди, бирләшкән Қазақстан – Хитай йәрмәңкилири өткүзүлүп туриду. ХЧҺМни һәр күни пәқәт җумһурийитимиз регионлирида әмәс, бәлки МДҺ әллиридин кәлгән 1,5 миңға йеқин адәм зиярәт қилиду. Мәркәздә 40тин ошуқ инфрақурулумлуқ объект пайдилинишқа берилди. Бийил касиплар шәһәрчисини ечиш көздә тутулуватиду, андин кейин конгресс-холл, сағламлаштуруш комплекси, шундақла пүтүнсүрүк сода орунлири пәйда болиду. Бақытжан Сағынтаев шундақла «Қорғас — Шәрқий дәрваза» мәхсус ихтисадий зониси қурғақ портиниң қурулуши билән тонушти. Бу йәрдә һазирниң өзидә контейнер мәйдани вә терминаллар ишләватиду, төмүр йол, электр әвәтиш линиялири, су билән тәминләш системиси кәлтүрүлди. Өткән жили қурғақ порт арқилиқ 19 миңдин ошуқ контейнер өткүзүлди. 2020-жилға қәдәр, йәни барлиқ мультимодальлиқ вә транспорт объектлири пайдилинишқа берилгәндә, порт арқилиқ 500 миңға йеқин контейнер өткүзүлиду. Делегация шундақла Алтынкөл төмүр йол станциясидә вә Ғәрбий Европа – Ғәрбий Хитай автомагистралиниң қурулуш ишлири жүргүзүлүватқан участкисида болди. Бақытжан Сағынтаев иш бабидики сәпәрниң йәкүнини чиқирип, Евразия ихтисадий иттипақиниң ташқи чегарисида автомобиль өткүзүш пунктлирини йеңилашниң зөрүр екәнлигини, чүнки моҗут инфрақурулумниң заманивий тәләпләргә җавап бәрмәйватқанлиғини тәкитлиди. Униңдин ташқири жүк өткүзүш ихтидарини көпәйтиш вә жүк тошиғучилар үчүн яхши шараит яритиш мәхситидә чегарида тәкшүрүштин өткүзүш вақтини қисқартиш бойичә әмәлий чариләрни көрүшниң зөрүр екәнлиги атап көрситилди. Өз новитидә Алмута вилайитиниң һакими Амандық Баталов мәхсус ихтисадий зона лайиһисиниң Йәттису тәвәсиниң ихтисадий өсүшигә иҗабий тәсир йәткүзүватқанлиғини тәкитлиди. Қурғақ порт 300гә йеқин йәрлик турғунни иш билән тәминлиди, алдимиздики жилларда ишчиларниң сани 6 миңғичә көпийиду. Истиқбалда чегара йенидики зона йеңи Ипәк йолиниң таянч нуқтилириниң биригә айлиниду.

379 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы