• «Мәшъәлниң» меһмини
• 31 Наурыз, 2016

Синақлардин сүрүнмигән сәнъәткар

Исми: Адилҗан Фамилияси: Өмәров Туғулған жили: 1986 Адилҗан Өмәров Қазақстанға тонулған талантлиқ эстрада нахшичилириниң бири.Адилҗан Өмәров 2006-жили «Евразия» телеканилида өткән «Super Star KZ» реалити-шоуға қатнишип, униң ахирқи басқучиғичә йәтти. Яш сәнъәткарниң шу чағда алаһидә маһарәт билән иҗра қилған нахшилири қазиларниң вә телетамашибинларниң жуқури баһасиға еришкәнлигидин көпчиликниң хәвири бар болса керәк. Һә, шу нахшичи һазир җумһурийитимиздә аммибап «RІNGO» топиниң әзаси. Яшлар арисида аммибаплиғи хелила үстүн мәзкүр топ, репертуариниң заманивийлиғи, һәрқачан изчил издиниш билән йеңилиқларға интилиши билән пәриқлиниду вә шу түпәйли мухлислириниң һөрмитигә сазавәр. Шуңлашқа улар пат-пат Қазақстанниң барлиқ шәһәрлиридә гастрольларда болуп, концертларни бериватиду. Топ әзалири кейинки вақитларда репертуарини йеңи нахшилар билән толуқтуруп, шуларға клиплар чүшириш билән бәнт. Атап өтүш керәкки, йеқинда миллий сәнъитимиздә исми көпчиликкә яхши мәлум Мурат Абрим оғли Әхмәдиев униңға «Пак муһәббәт» намлиқ лирикилиқ нахшисини йезип бәргән еди. Адилҗан пат арида әйнә шу нахшини тамашибинлар диққитигә һавалә қилиш йолида ишләватиду. Әнди көплигән синақлардин сүрүнмәй, Қазақстан эстрадисида өзиниң таланти арқилиқ тонулуп келиватқан Адилҗанниң шәхсий һаятиға тохталсақ, А.Розибақиев намидики 153-мәктәп-гимназияни тамамлиған. Аилилик, икки яшлиқ Аиша исимлиқ қизи бар. — Иҗадийитимни техиму бейитиш мәхситидә йәнә көплигән нахшиларни йәккә орунлашни нийәт қиливатимән. Аманчилиқ болса, йеңи альбомь үстидиму бираз ишлар жүргүзүлүватиду. У сәнъәтхумар тамашибинлиримизниң көңлидин чиқидиғанлиғиға ишәнчим камил – дәйду Адилҗан биз билән болған сөһбәттә. Өз новитидә, бизму Адилҗанниң арзу-арманлириниң рояпқа чиқишиға тиләкдашлиқ билдүрүп, ишлириға утуқ тиләймиз.

Адиләм МӘСИМҖАН.