• Һасан-һүсән
• 19 Мамыр, 2016

«Биз бәхитлик балилар»

Бәхит адәм балиси үчүн әң қиммәт нәрсидур. Биз, һазирқи өсүп келиватқан әвлатлар, интайин бәхитлик. Чүнки йенимизда бизгә өз меһрини төкүп, беқип, өстүргән ата-анимиз бар, билимлик болсун дәп оқутуп, пәрванә болуп жүргән устазлиримиз бар, келәчәккә йол ечип йол-йоруқ көрситип келиватқан  Президентимиз бар, бепаян, гөзәл Вәтинимиз бар. Заманимиз теч, хатир­җәм­ликтә, барлиқ нәрсимиз тәл-төккүз хошал һаят кәчү­р­мәктимиз. Мошуниң һәммиси бәхит әмәсму. Мән Қорам йезисида туғулдум.  Бу жили он яшқа қәдәм бастим. Қорам оттура мәктивиниң 3-«В» синипида оқуймән. Бизниң синипта он сәккиз оқуғучи оқуйду. Синип бөлмиси кәң вә йоруқ. Синип йетәкчимиз Зоһра Иминова бизгә пухта билим бериш билән биллә, көплигән чарә-тәдбирләрни қизиқ һәм көңүллүк өткүзиду. Мәктәпара һәрхил байқашлардин дайим алдинқи орунларни алимиз. Дәм елиш күнлири устазимиз бизни сәяһәткә апириду. Биз устазимизни яхши көримиз. Шундақ меһриван муәллимимиз барлиғиға пәхирлинимиз. Мән чоң болғанда, уссулчи болушни арман қилимән. Һазир мәктәптики уссул өмигигә қатнишиватимән. Келәчәктә чоң сәһниләрдә көрүнүп, уссул шәйдаси болғум келиду. Қисқиси, мошундақ течлиқта өмүр сүрүп, шат-шадиман жүргинимгә мән бәхитликмән. Ата-анам, достлирим, устазим вә уруқ-туққанлирим бәхитлик яшисекән, дәп бир Алладин тиләймән.

Сабина АБДРАХМАНОВА,

Қорам оттура мәктивиниң 3-синип оқуғучиси.

Әмгәкчиқазақ наһийәси.