- Турнир
- 20 Мамыр, 2016
Ғәйрәтликләр йәнә биринчи орунда
Йеқинда Әмгәкчиқазақ наһийәсиниң Тәшкәнсаз йезисида Кеңәш Иттипақиниң Қәһримани Мәсим Яқуповниң хатирисигә беғишланған Х җумһурийәтлик футбол турнири болуп өтти. Уни «Кентавр» қабилийәтлик спортчиларға ярдәм қилиш» җәмийәтлик фонди вә «Инайәт» ассоциацияси уюштурди. Турнирға Алмута шәһириниң ЦСКА, Уйғур наһийәси Чонҗа йезисиниң, Әмгәкчиқазақ наһийәсиниң, шундақла Байсейит, Ғәйрәт, Әмгәк, Челәк вә Тәшкәнсаз йезилириниң командилири қатнашти.
Турнирниң мәзкүр йезида өтүши тәсадипи әмәс. Чүнки, Ташкәнсазда футбол ишқивазлири интайин нурғун. Мәшиқләндүргүчи Нурамбәг Ниязов он жилдин ошуқ вақит ичидә 100дин ошуқ балини тәрбийилиди. Футболниң җанкөйәрлири болса уларни поңзәк, спорт кийимлири билән тәминләп, яшларни саламәтлик һаят тәрзигә дәвәт қилип кәлмәктә. Алмута шәһиридә истиқамәт қиливатқан ташкәнсазлиқларниң вә йеза активистлириниң ярдими билән икки жилдин бери йезида йеңи стадион бәрпа болди. Мошу йәрдә Әмгәкчиқазақ наһийәлик мәслиһәтниң депутати, балилиқ һәм яшлиқ дәврини Ташкәнсазда өткүзгән Руслан Қалиевниң стадионниң инфраструктурисини йетилдүрүш үчүн қошуп келиватқан төһписини атап -өтүшкә әрзийду. Униң ярдими билән стадион қоршилип, әтрапиға 500дин ошуқ түп дәл-дәрәқ олтарғузулди. Стадионни қанунийлаштуруш үчүн һаҗәтлик һөҗҗәтләрни тәйярлашму қолға елинди. Стадионниң қурулушиға наһийә рәһбәрлиги жуқури баһа берип, кейинки вақитларда футбол бойичә «Конфедерация кубоги», «Наһийә һакиминиң кубоги» вә «Наһийә чемпионати» мошу йезида өтүватиду.
Нурамбәг ака «Кентавр» қабилийәтлик спортчиларға ярдәм қилиш» җәмийәтлик фондиниң президенти, СССР спорт маһири, Қазақстан Җумһурийитиниң хизмәт көрсәткән мәшиқләндүргүчиси Махмут Искәндәровниң ярдимидә ЦСКА спорт клуби билән келишим-шәрт түзүп, 51 шагиртиниң мәзкүр спорт мәркизидә тәрбийилинишигә мүмкинчиликләр яратти. 2001-2002-жили туғулған ташкәнсазлиқ төрт яш футболчи булту ЦСКА мәркизидә өткән оюнға қатнишип, мукапатлиқ ІІ орунға еришти. Йезиниң алтә балиси җумһурийәтлик чемпионатта ЦСКА тәркивидә оюн ойниди. Бултур 15 яшлиқ Рустәм Эмиров елимизниң 25 футболчиси қатарида «Крузейро» футбол клуби билән 3 жиллиқ келишим-шәрт түзүп, Бразилияға атланди.
Бийилқи турнирниң ечилиш мәрасимиға беғишланған тәнтәнини «Инайәт» ассоциациясиниң әзаси Тәләт Һәмраев ечип, Мәсим Яқуповниң тәрҗимә һалиға тохтилип өтти. Андин Ташкәнсаз йеза округиниң һакими Мәһәммәтҗан Султанияров, наһийәлик мәслиһәтниң депутати Руслан Қалиев турнир уюштурғучилириға чәксиз миннәтдарлиғини изһар қилди.
Икки күнгә созулған турнирниң йәкүни чиқирилип, Ғәйрәт йезисиниң командиси І орунни егилиди.
Шундақла ғәйрәтликләр барлиқ номинациялар бойичә башқилардин озуп чиқти. Җүмлидин Ришат Имрәмзиев «Әң яхши мәшиқләндүргүчи», Назим Һаки «Әң яхши оюнчи», Ялқун Турсун «Әң яхши дәрвазичи», Ихтиандир Майдин «Тамашибин мәптүнкари» аталса, мәзкүр йезидики Исмайил Саттаров намидики оттура мәктәпниң мудири Әзимҗан Мәрүпов, яшларға алаһидә ғәмхорлуқ көрситип келиватқан Қудрәт Исмайилов вә Ғәйрәт йезилиқ аяллар кеңишиниң рәиси Зәйтүнәм Турданова турнирни уюштурғучиларниң маддий вә мәнивий соғилириға еришти.
ЦСКА командиси – ІІ, Тәшкәнсаз йезисиниң командиси –ІІІ, Челәк йезиси А.Розибақиев намидики оттура мәктивиниң командиси ІV орунларни егиләп, мәхсус мукапатларға сазавәр болди.
Рашидәм РӘҺМАНОВА.
Әмгәкчиқазақ наһийәси.
330 рет
көрсетілді0
пікір