• 31-май — Сәясий тәқип қурванлирини хатириләш күни
• 02 Маусым, 2016

Дуа-тәгбир ата-бовилар роһиға беғишланди

Мәлумки, 1918-жилқи «Ату паҗиәси» Әмгәк­чиқазақ наһийәсиниң бар­­лиқ йезилирида өз там­ғисини қалдуруп кәтти. Шуңлашқиму Қазақстан Җумһурийитиниң Президенти Н.Ә. Назарбаевниң 1997-жилқи Пәрманиға бенаән һәр жили 31-май күни наһийәниң җай-җайлирида сәясий тәқип қурванлирини хатириләш күни  өткүзүлүп келиватиду.Мундақ чарә-тәдбир Лавар йезисида  һәр жили уюштурулуп, әрвалар роһиға атап дуа-тәгбир оқулиду. Наһийәлик Уйғур этномәдәнийәт мәркизиниң Достлуқ йезисидики шөбисиниң рәиси Халбүви Дуганованиң тәкитлишичә, бийилқи нәзир округниң барлиқ турғунлириниң күч чиқириши вә Достлуқ йезиси Бертаев кочиси турғунлириниң уюштуруши билән өтти. Лавар йезисида өткән мәрасимни, адәттикидәк, Қаратуруқ йеза округиниң һакими Ермек Самсыбеков ечип, униңға риясәтчилик қилди. «Нур Отан» партияси Әмгәкчиқазақ наһийәлик  шөбисиниң рәиси Қуат Байғожаев, филология пәнлириниң намзити Рабик Исмайилов, җумһурийәтлик Уйғур этномәдәнийәт мәркизи рәисиниң орунбасари, Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов, Алмута шәһәрлик Уйғур этномәдәнийәт мәркизиниң рәиси Абдуллам Һошуров, Челәк жутиниң ақсақили Иминҗан Насиров вә башқилар сөзгә чиқип, наһәқтин-наһәқ шейит болған ата-бовилиримизни, уларниң бешиға чүшкән мүшкүл күнләрни әсләп өтти. Достлуқ йезиси жигитбешиниң орунбасари Авутахун Сәйдуллаев Қаратуруқ, Достлуқ, Лавар йезилириниң җамаәтчилигигә ушбу мәрасимни өткүзүштики паалийәтчанлиғи үчүн миннәтдарлиғини  билдүрди. Мәрасим  давамида  униң қатнашқучилири Лавардики «ату» паҗиәси қурванлириниң хатирисигә орнитилған ядикарлиқ мәсилисини көтәрди. Әскә салсақ, ядикарлиқ 1995-жили Иминҗан Насиров вә Исмайил Абдурахманов кәби милләтпәрвәр акиларниң тәшәббуси билән бәрпа болған еди. Шуниңдин бери ядикарлиқ упрап, бүгүнки күндә җиддий җөндәшни тәләп қилиду. Униң әтрапини қоршаш керәклиги һәққидиму дайим ейтилип кәлмәктә. Мошу йәрдә бу ишниң наһийәлик Уйғур этномәдәнийәт мәркизи тәрипидин қолға елинип, ядикарлиқни рәсмийләштүрүш ишлириниң әмәлгә ешиватқанлиғиниму тәкитләп өткән орунлуқ. Ахирида мәзкүр жутниң имами Нурахун Хәйрахунов шейит болған қериндашларниң роһиға атап қуръан тилавәт қилди. Митингтин кейин ядикарлиққа гүлчәмбәрләр қоюлуп, әрвалар роһиға атап нәзир берилди. «Ату» паҗиәси қурванлири хатирисигә беғишланған мундақ митинглар, шундақла Қорам вә Кейиквай йезилиридиму болуп өтти. Униңға көплигән җамаәтчилик вәкиллири қатнашти.

Рашидәм РӘҺМАНОВА.

Әмгәкчиқазақ наһийәси.