• Әхбаратлар еқими
• 09 Маусым, 2016

«Роһанийәт вә мәдәнийәт» китави

Йеқинда Қазақстан Җумһурийитиниң Миллий китапханисида Р.Сүлейменов намидики Шәриқшунаслиқ институтиниң мудири, филология пәнлириниң доктори, профессор Әбсаттар һаҗи Дербисәлиниң «Атамұра» нәшриятидин йоруқ көргән «Роһанийәт вә мәдәнийәт» намлиқ китавиниң тонуштуруш мәрасими болуп өтти. Униңға көрнәклик алимлар, тәтқиқатчилар, язғучилар, оқутқучилар, дин вә җәмийәт әрбаплири, студентлар, аммивий әхбарат васитилириниң вәкиллири қатнашти. Мәрасим риясәтчиси М.Әвезов намидики Әдәбият вә сәнъәт институтиниң мудири, филология пәнлириниң доктори Уәлихан Қалижан китап муәллипиниң илмий паалийити вә мәзкүр әмгәкниң мәзмуниға, бүгүнки күндики әһмийитигә тәпсилий тохталди. 400дин ошуқ илмий әмгәкләрниң муәллипи, әрәп әдәбиятини қазақ тилида тунҗа қетим тәтқиқ қилған көрнәклик шәриқшунас алим Ә.Дербисәлиниң қириқ бәш басма таваққа йеқин һәҗимдики бу әмгигидә әдәбият, мәдәнийәт, роһанийәт, исламшунаслиқ, мәнбәшунаслиқ вә башқиму саһалар бойичә жүргүзгән тәтқиқатлири орун алған. Китап «Ислам – улуқ дин», «Ислам – улуқ мәдәнийәттә», «Қурултайлар вә әнҗуманлар үлгилиридә», «Сөһбәтләр», «Тәрҗимиһал баянлири», «Қолязмиларда», «Алим муфти, әрбап яки замандаш һәққидә ойлар» намлиқ йәттә баптин ибарәттур. Мәрасимда сөзгә чиққан фолософия пәнлириниң доктори, академик Абдумалик Нысанбаев, Қазақстанниң хизмәт көрсәткән әрбаби, академик Төлеген Қожамқулов, тарих пәнлириниң доктори, академик Мамбет Қойгелдиев, филология пәнлириниң доктори, җәмийәт әрбаби Шәмшә Беркимбаева, филология пәнлириниң доктори, профессор Айгүл Исмақова, Әл-Фараби намидики Қазақ миллий университети, Шәриқшунаслиқ факультетиниң декани, профессор Баян Жубатова, Нур-Мубарәк университетиниң проректори, профессор Шәмшидин Керим вә башқилар китапниң әһмийитини, шундақла мәмликәтниң келәчиги вә тәрәққиятида тутқан орнини алаһидә тәкитлиди.

 Рәхмәтҗан  ЙҮСҮПОВ.