- Җәмийәтлик тәшкилатларда
- 26 Маусым, 2012
ҖУЭМ йеңиланған тәркиптә ишқа киришти
Дүшәнбә күни Алмутидики «Қәшқәр» этноресторанида җумһурийәтлик Уйғур этномәдәнийәт мәркизи (ҖУЭМ) башқармисиниң новәттики мәҗлиси болуп өтти. Униңда ҖУЭМ рәисиниң орунбасарлири билән кеңәш рәислирини қайтидин сайлаш мәсилиси қаралди.
Мәҗлисни ҖУЭМ рәиси Шаһимәрдан Нурумов киришмә сөз билән ачти. Натиқ өз сөзидә бир қатар уйғур җәмийәтлик тәшкилатлириниң, ҖУЭМниң җай-җайлардики шөбилириниң рәислири, жигит башлири билән учрашқанлиғини, уларниң асасий мәхсити хәлқимиз арисида өмлүкни қолға кәлтүрүштин ибарәт екәнлигини алаһидә қәйт қилди. Шаһимәрдан Үсәйин оғли шуниңдин кейин жиғилғанларни өзиниң орунбасарлири һәм башқармиға йеңидин әза болуп киргән шәхсләр билән тонуштурди. Шундақ қилип, исми хәлқимизгә тонулған меценат, «АДЭМ» сода комплексиниң иҗраий мудири Сәдирдин Әһәтов ҖУЭМ рәисиниң биринчи орунбасари, Алмута вилайәтлик Уйғур этномәдәнийәт мәркизиниң рәиси Реһимҗан Тоқаев орунбасари болуп сайланди. Илгәрки икки орунбасар — Қазақстан хәлқи Ассамблеясиниң әзалири, ҖУЭМ Ханим-қизлар кеңишиниң рәиси Әхтирим Әхмәтова билән Бәгләр кеңишиниң рәиси Абдурешит Мәхсүтов өз вәзипилирини давамлаштуридиған болди.
Мошу йәрдә ҖУЭМ башқарма әзалири тәркивиниң хәлқимиз арисидила әмәс, җумһурийитимиз даирисидә тонулған шәхсләр билән толуқтурулғанлиғини алаһидә тәкитләп өткүмиз келиду. «Туран» университетиниң проректори, ихтисат пәнлириниң доктори, профессор Һакимҗан Арупов, Әл-Фараби намидики Қазақ миллий университетиниң профессори, әдлийә пәнлириниң доктори Шәймәрдан Шәрипов, сәясәтшунас Һакимҗан Мәмәтов, Яркәнт шәһиридики «Ирадә» дехан егилигиниң мудири, меценат Дилшат Насиров, «DUNІYA-APT» галереясиниң мудири Һакимҗан Гүлиев вә башқилар шулар җүмлисидиндур.
Мәҗлистә ҖУЭМниң пәхрий рәиси, Қазақстан хәлқи Ассамблеяси Кеңишиниң әзаси Әхмәтҗан Шардинов вә башқарма әзаси, Қазақстан хәлқи Ассамблеясиниң әзаси Асимҗан Злавдинов өзлириниң мәркәз башқармисиниң әзаси сүпитидә қалидиғанлиғини, униң ишини техиму җанландурушта паалийәтчанлиқ көрситидиғанлиғини, болупму ҖУЭМ ишиға тосалғулуқ қилидиған, умумән, хәлқимизниң бирлигигә сәлбий тәсирини йәткүзидиған һәрикәтләргә йол қоймайдиғанлиғини алаһидә тәкитлиди.
Мәҗлис давамида сөзгә чиққан натиқлар Әхмәтҗан Бәкрим оғлиниң тоққуз жил ичидә әмәлгә ашурған үнүмлүк паалийитигә миннәтдарлиқ билдүрүп, ҖУЭМниң йеңи рәиси Шаһимәрдан Нурумовқа муваппәқийәт тилиди һәм мәркәз ишини җанландурушта «Бир яқидин — баш, бир йәңдин қол чиқириш» һаҗәтлигини тәкитләшти.
Ершат ӘСМӘТОВ.
1236 рет
көрсетілді0
пікір
