• Тонушуп қоюң
• 08 Шілде, 2016

Үсүпҗан пәтмус яки Нийити ақ қара тәнлик жигит һәққидә

Ахирқи пәйтләрдә яшлиримизниң өйлиниш тойлириға «Үсүпҗан пәтмус» исимлиқ қара тәнлик нахшичини тәклип қилиш әнъәнигә айланди.  Көпчилигимизни униң ким екәнлиги қизиқтуридиғанлиғи һәқ. Нахшичиниң исми Юсуф фамилияси Бадмус. У Нигериядин Қазақстанға футбол ойнашқа келип, ойлимиған йәрдин алмутилиқ болуп қалиду. Дәсләп Горний Гигант мәһәллисидики ашханиларниң биригә ашпәз болуп ишқа орунлишиду. Башта ашхана хизмәтчилириниң көңлидә гуман пәйда болсиму, лекин қоли йеник Юсуф тез арида уйғур таамлирини тәйярлашни үгинивалидудә, ашхана рәһбәрлигиниң, болупму турақлиқ херидарларниң  сөйүмлүк ашпизигә айлиниду. Мошу йәрдә Юсуфни талантлиқ сорунбеги Дилшат Закиров учритип қелип, униң сәнъәткә йеқин екәнлигидин хәвәр тапиду вә уни сәнъәт йолиға башлайду. Тиришчан жигит тез арида уйғурчә нахшиларниму үгинивалиду. Нәтиҗидә «Яңра нахшам» намлиқ концертта уйғур тилида нахша ейтип,  тамашибинларни һәйран қалдуриду. Мана шуниңдин етиварән,  у той-төкүнләрдә, һәрхил мәрасим-сорунларда таланти билән көпчиликни қайил қилип кәлмәктә. Йеңи ағинилири  уни «Үсүпҗан пәтмус» дәп атайду. «Қериндишимиз» Үсүпҗан бу шәһәрдин бәхтини тепипму үлгәрди.   Униң өмүрлүк  җүпти – қазақ қизи Қымбат. Өткәндә улар дост-яранлири билән өйлиниш тойини дағдуғилиқ өткүзди. Һазир Үсүпҗан өзи тәшкил қилған «Хакуна Мататада» («Чатақ йоқ») ансамбли паалийәт елип бериватиду. Репертуарида уйғур хәлиқ нахшилиридин түзүлгән «Поппури»,  шундақла «Аппақ тошқанлар», «Саадәтхан» вә «Мәшрәп» намлиқ нахшилар бар. Өткәндә, тарихий вәтинимиздин кәлгән артистлар алдида «Дәрвишләр» топиниң аммибап «Тойнамә» нахшисини орунлиғанда, қериндашлиримиз уни гүлдурас чаваклар астида қарши алди. Үсүпжанниң уйғур тилида нахша ейтип жүргинини бәзи қериндашлиримиз тоғра көрмәйватқан охшайду. «Өзимизниң нахшичилири турғанда, уни сорунларға тәклип қилишниң һаҗити йоқ» дегән гәпләрниму аңлидим. Униңда  турған немә бар? Ана тилимизда сөзләшни уят көридиған «бәзилиримизгә» қариғанда, африкилиқ Үсүпҗанниң, йәни келип, уйғурчә исимни өзигә ят көрмәй, уйғур тилида сөзләп, нахша ейтиватқини бизгә савақ һәм үлгә болуши керәкқу! Әтә-өгүн уйғур нахшилирини Африкида яңритип, миллитимизни дуния әһлигә тонутса,  нур үстигә нур болмамду? Өзиму шуни мәхсәт қилған охшайду. Барикалла, Үсүпҗан! Абдулҗан АЗНИБАҚИЕВ.