• Йеңилиқлар
• 15 Шілде, 2016

Премьер Шималий Қазақстан вә Қостанай вилайәтлиридә болди

Дүшәнбә күни Һөкүмәт башлиғиниң Шималий Қазақстан вилайитигә қилған иш бабидики сәпири Қарасай вә Ағынтай батырларниң мемориал комплексини зиярәт қилип, XVII әсирдә һазирқи Айыртау наһийәсиниң территориясидә ана йәрни басқунчилардин қоғдап қалған қәһриманларниң роһиға тазим қилиштин башланди. 1999-жили Президент Нурсултан Назарбаевниң тапшурмиси билән селинған улуғвар мәқбәрә өтмүш билән бүгүнки күнни бағлаштуруп, Қазақстан хәлқи бирлигиниң, достлуғиниң вә җипсилиғиниң рәмзигә айланди.

Шималий Қазақстан вилайитиниң һакими Ерик Султанов Кәрим Мәсимовни  33 миң гектардин ошуқ йәрдә данлиқ, май чиқиридиған, йәм-чөп зираәтлирини йетиштүрүш, гөш йөнилишидики чарвичилиқ билән шуғуллиниватқан чоң егилик – «Бабық-Бурлуқ» ҖЧЙниң етизлири билән тонуштурди. Мошу йәрдә Шималий Қазақстан вилайити һакиминиң орунбасари Айдарбек Сапаров Министрлар кабинетиниң башлиғиға вилайәттә аграр-санаәт комплексини тәрәққий әткүзүш тоғрилиқ тәпсилий әхбарат бәрди. Бу йөнилиштики утуқлар очуқ көрүнүп туриду. Мәсилән, регион йеза егилиги йетиштүргән умумий мәһсулатниң көләми 39,2 миллиард тәңгини тәшкил қилди, бу өткән жилниң мошу дәриҗисигә нисбәтән 102 пайизни тәшкил қилиду. Андин кейин Премьер-Министр аграр-санаәт комплексини техиму тәрәққий әткүзүш мәсилилиригә беғишланған кеңәшмигә қатнашти. Кеңәшмидә йеза егилиги министри Асқар Мырзахметов, «Атамекен» Миллий тиҗарәтчиләр палатиси башқармиси рәисиниң орунбасари Нуржан Әлтаев вә башқа җавапкәр шәхсләр мошу йөнилиштә жүргүзүлүватқан ишниң нәтиҗилири,  һазирқи әһвал тоғрилиқ һесават бәрди. Шу күни Премьер-Министр вилайәт мәркизидә Петропавловск аэропортини, йеқинда пайдилинишқа берилгән Спорт сарийини, «Нурсат» балилар бағчисини, С.Муқанов намидики вилайәтлик Қазақ музыкилиқ драма театрини зиярәт қилди. «Машиностроительный завод КазТехМаш» җавапкәрлиги чәкләнгән йолдашлиғида Кәрим Мәсимов вилайәттә ишләпчиқирилған йеза егилиги техникиси көргәзмисини көздин кәчүрди. Андин кейин Һөкүмәт башлиғи «Иш билән тәминләшниң йол хәритиси-2020» программисини әмәлгә ашуруш мәсилилири бойичә кеңәшмигә қатнашти.

***

Сешәнбә күни Премьер-Министр Қостанай вилайитидә болди. Һөкүмәт башлиғиниң иш бабидики сәпириниң программиси аэропорт вә «Аэропорт» микрорайони қурулушиниң кетип бериши билән тонушуштин башланди. Вилайәт һакими Архимед Мухамбетов Премьер-Министрға регионда турушлуқ өй қурулушиниң кетип бериши тоғрилиқ әхбарат бәрди. Андин кейин Кәрим Мәсимов «СарыарқаАвтоПром» ҖЧЙ карханилирини зиярәт қилип, елимиз автомобиль кластериниң тәрәққий етиши билән тонушти. У кәпшәләш, сирлаш, қураштуруш цехлирини, йеник автомобильлар билән коммерциялик техника, ашлиқ жиғиштуруш комбайнлири билән электромобильлар тизилған сәпни көздин кәчүрди. Премьер-Министр кархана рәһбәрлиги билән Қазақстанда автомобиль ясаш санаитини тәрәққий әткүзүш, саһани дөләт тәрәптин қоллап-қувәтләш чарилирини вә херидарлар тәливини рәғбәтләндүрүш мәсилилирини муһакимә қилди. Андин кейин у И.Алтынсарин намидики вилайәтлик мемориал мирасгаһни зиярәт қилди. Премьер-Министр бу йәрдә педагогика алий оқуш орунлириниң учумкарлирини муәллимләр қатариға қобул қилиш мәрасимиға қатнашти. Ихтисаслаштурулған аһалиға хизмәт қилиш мәркизидә «Һөкүмәт гражданлар үчүн» дөләт корпорацияси даирисидә аһалиға хизмәт қилиш мәсилилири тоғрилиқ» кеңәшмигә қатнашти. Андин кейин Һөкүмәт башлиғи Рудный шәһиригә кәлди. Бу йәрдә «Лидер 2010» сүтни қайта ишләш җавапкәрлиги чәкләнгән йолдашлиғида чарвичилиқ саһасиниң һазирқи әһвали вә истиқбалиға беғишланған кеңәшмә болуп өтти. Кеңәшмә ишиға Қостанай вә униңға хошна вилайәтләрниң, «Атамекен» Миллий тиҗарәтчиләр палатиси, Қазақстан Гөш йетиштүргүчиләр иттипақиниң, Қазақстан Сүт йетиштүргүчиләр иттипақиниң, Қазақстан Қуш өстүргүчиләр иттипақиниң, Қазақстан Фермерлар иттипақиниң йеза егилиги мәһсулатини йетиштүргүчилири, «НУХ «КазАгро» акционерлиқ җәмийитиниң вәкиллири қатнашти. Премьер-Министрниң иш бабидики сәпириниң программиси ишләпчиқиришни диверсификацияләшниң утуқлуқ үлгилириниң бири һесапланған «ССГПО» акционерлиқ җәмийитиниң металл прокат заводини зиярәт қилиш билән аяқлашти.