- «Мәшъәлниң» меһмини
- 22 Шілде, 2016
Шаирә Шаирәм
Исми: Шаирәм
Фамилияси: Баратова
Туғулған жили: 1980
Билими: алийМутәхәссислиги: муәллим
Көпқирлиқ иҗаткар Шаирәм Баратовани узундин бери яхши билимән. Униң шеирлири ана тилимизда нәшир қилиниватқан гезит вә журналларда турақлиқ йоруқ көрмәктә. Шаирәниң мәзмунлуқ шеирлириға иллиқ инкаслирини билдүрүп жүргәнләрму көп. Мәсилән, исми ядимдин көтирилип қапту, Белгиядә истиқамәт қилидиған бир қериндишимиз мениңдин Интернет арқилиқ Шаирәниң шеирлириниң электрон нусхисини әвитишни сориған еди. Шуниңдин кейин яшлиримизниң илтимасиға бенаән, уйғур тиллиқ иҗтимаий торларда Шаирәм Баратованиң шеирлирини чиқарған едим. Әнди «Шатлиққа тәшналиқ» намлиқ топлими нәшир қилинип, кәң оқурмәнләр аммисиға сунғанда, яш иҗаткарниң иҗадийитигә ғоллуқ зиялилиримиз сәмимий баһасини бәргәнлигигә талай қетим гува болдуқ.
Шаирәм Бағдат қизи Баратова 1980-жили Алмута вилайити Уйғур наһийәсигә қарашлиқ Ардолата йезисида дунияға кәлгән. У 1997-жили Шерин оттура мәктивини тамамлап, шу жили Абай намидики Қазақ Миллий педагогилиқ университетиниң филология факультетиға емтиһансиз қобул қилинди. 2001-жили мәзкүр билим дәргаһини утуқлуқ тамамлап, устазлиқ паалийитини ана мәктивидин башлайду.
Шаирәм Бағдат қизиниң йәнә бир қири, униң илмий паалийити. У 2008-жили «Заманивий қазақ вә уйғур силлабикилиқ поэзияси: өлчәм, ритм вә қапийә (1950 – 2000-ж.ж.)» мавзусида диссертация яқлап, филология пәнлириниң намзити илмий унваниға егә болди. Яш алимә 2006-жилдин башлап Р.Сүлейменов намидики Шәриқшунаслиқ институтида илмий хадим болуп ишләватиду. Шундақла, Шаирәм Баратова өзи тәһсил көргән Абай намидики Қазақ миллий педагогика университетиниң уйғур бөлүмидә студентларға дәрис бериду.
Җәмийәтлик ишларниңму паал иштракчиси болған Шаирәм Баратова бүгүнки таңда қайнақ иҗадийәт үстидә.
– Дәсләпки топлимим йоруқ көргәндин кейин, мухлислиримниң яхши тиләк-изаһлирини аңлап, қанитимға қанат пүтти. Худа халиса, мошу жилниң ахириғичә, йәнә бир топлимини нәшир қилдуруш арминим бар, – дәйду шаирә өзиниң кәлгүси реҗилири һәққидә ейтип.
Исми җисмиға ярашқан Шаирәм һәдигә барлиқ гезитханлар намидин иҗадий утуқлар тиләймиз.
Абдулҗан АЗНИБАҚИЕВ.
544 рет
көрсетілді0
пікір