• Йеңилиқлар
  • 22 Шілде, 2016

Коллективниң бирлиги – рәһбәргә бағлиқ

Ершат ӘСМӘТОВ, «Уйғур авази».a.ershat@mail.ru/ «Башлиғим билән мунасивитим яхши әмәс. Шуңлашқа мениң қилған ишим көрүнмәйду һәм баһаланмайду». «Башлиғим өзиниң «любимчиклири» биләнла мәслиһәтлишиду. Башқиларниң пикрини инавәткә алмайду» «Башлиғим мениңла кәйнимгә киривалди. Демәк, мени иштин чиқиришни ойлап жүриду».

Маңа мошу териқидики гәпләрни бизгә у яки бу мәһкимә-ширкәт хизмәтчилиридин пат-патла аңлашқа тоғра келиду. Бирақ у шикайәтләрниң һәқиқәткә қанчилик йеқин екәнлигини биливелиш тәс. Амма йошуридиғини йоқки, аримизда  дайимла рәһбәргә «ора қолайдиған» хизмәтчиләрму, әксичә, қол астидикиләрниң әсәбигә тегип, җенини еқитишни адәткә айландурувалидиған башлиқларму бар. Мәйли, башлиқниң көрәлмәс-һәсәтхорлири, мәнсивини талишиватқанлар бар дәйли. Әнди рәһбәрниң өз вәзиписини тәләпләр дәриҗисидә орунлаватқан, салаһийәтлик мутәхәссисигә «чишини қайриғинини» қандақ чүшинишкә болиду? Немә үчүн башлиқ өзи рәһбәрлик қиливатқан  иш  орниниң аброй-инавити көтириватқан адәмни йәклиши керәк?  Бизчә болғанда, мундақ йолни таллиған рәһбәр узаққа бармайду һәм ундақларниң ишиму алға басмайду. Әнди һеч оқәт қилмай, рәһбәрликни яманлап жүридиғанларға келәйли. Улар қолидин иш кәлмигәчкә, паалийитидә мувапәққийәт қазиналмиғачқа, гунани башқиларға яки башлиғиға артип қоюшни әвзәл көриду. Йәни ишлимигән адәмниң вақти көпирәк болғачқа, шуни әпқачти гәп тоқушқа, ғевәт-шикайәт қилишқа, ишләватқанларға путликашаң болушқа сәрип қилиду. Мошундақ адәмләр бар коллективларда бөлгүнчилик, груһвазлиқ яки жутвазлиқ охшаш әһваллар йүз бериду. Йошуридиғини йоқки, һәтта бәзидә рәһбәрлик  өзиниң арисидиму тил тепишалмаслиқ әһваллириму болуп қалиду. Мундақ йеқимсиз көрүнүшләр барлиқ иш орунлирида дегидәк, һелиму моҗут. Немила демәйли, гунани кимгила артмайли, һәрқандақ иш орнидики вәзийәт рәһбәрниң қолида. Униң биринчи вәзиписи — коллективтики бирлик — өмлүкни тәләп қилиш. Рәһбәр мүмкин қәдәр өз қол- астидикиләрниң әһвали билән пухта тонушуп чиқиши, шуниңға бағлиқ шәрт-шараит яритиши лазим. Бу әлвәттә, иш җәрияниға сәлбий тәсирини йәткүзмәслиги керәк. Башлиқлар шундақла өзигә йетип кәлгән әхбаратларни чоңқур тәһлил қилип, униң ақ-қарисиға йәткәндин кейинла қарар қобул қилмиса, бирәвиниң угалиға қелиши еһтималдин жирақ әмәс. Чүнки бәзидә коллективтики өзара өчмәнлиги бар адәмләр «башлиғини ишқа селиш» арқилиқ өз рәқивидин өч елиш нийитидә болуши мүмкин. Башлиқ билән қол астидикиләрниң арисида туғулидиған зиддийәтниң йәнә бир сәвәви — уларниң пикирлириниң, көзқарашлириниң бир-биригә уйғун кәлмәслиги. Мундақ пәйттә уларниң мәсилигә чүшәнчә билән қарап, муһакимигә селип, һиссиятқа берилмәй,   келишим йоли билән мурәссәгә кәлгини әвзәл. Яманлиқ издәш,  попуза яки шикайәт қилиш  билән мәсилә һәргиз йешилмәйду. Хуласиләп ейтқанда, сәмимийәт, кәңқосақлиқ, кәчүрүмчанлиқ  болған йәрдә бирлик-өмлүкниң, хатириҗәмликниң вә тәрәққиятниң камал тапидиғанлиғи талашсиз.

459 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы