• Дидар ғенимәт
  • 30 Тамыз, 2016

Аридин 50 жил өтсиму...

Буниңдин йерим әсир вақит илгири  кичик йеза вә мәһәллиләрдә толуқ әмәс оттура мәктәпләр болидиған. Сәккизинчи синипқичә шу мәктәпләрдә  билим елип, қалған чоң синипларни хошна йезилардики толуқ оттура мәктәпләрдә тамамлаттуқ. Мән өзәм кичикақсулуқ. Бизму өз вақтида Чоң Ақсу йезисиға қатнап, билим алдуқ.Бизниң заман ата қилған ғәзнә – у мениң сабиқ синипдашлирим. Биз улар билән һәр он жилда учришишни әнъәнигә айландурдуқ. Буниңдин 50 жил илгири, йәни 1966-жили Чоң Ақсу оттура мәктивиниң 11-«Б» уйғур синипни 29 нәпәр қиз-жигит пүтирип, чоң һаятқа қанат қаққан едуқ. Һәрбиримизниң һаятида ушбу йерим әсир мабайнида көплигән өзгиришләр йүз бәрди. Аилә қурдуқ, пәрзәнт қучтуқ дегәндәк. Бүгүн нәвриләрниң шат күлкисидин бәһриман болуватқан ақ чачлиқ, сериқ чишлиқ момай вә бовайлар қатариға қошулдуқ. Һәрбиримиз қутлуқ өйниңла әмәс, бир жутниң аниси вә атисиға айландуқ.  Әпсуслинарлиғи шуки, 29 синипдашниң тоққузидин бемәзгил айрилип қаптимиз. Шуларниң ичидә җәмийәтлик ишларниң бешида жүридиған Гүлварәм Махмутовани алаһидә тәкитлигим келиватиду. 40 жиллиқ учришишта нәқ мошу Гүлварәм 50 жиллиқ учришишни тақәтсизлик билән күтидиғанлиғинини ейтқан еди. Әпсус, 50 жиллиқ учришишқа бир жил қалғанда шум әҗәл уни аримиздин елип кәтти.

Мәрасим давамида биз бақилиқ болған ушбу синипдашларға Қуръан тилавәт әттуқ. Андин синип йетәкчимиз Шапим, Мәсмахун акиларни вә Маһинур һәдини әсләп, шу жилларға хиялән сәпәр чәктуқ. Шапимкамниң мону сөзи техи һәммимизниң ядида екән. «Кокул дегән атта болиду, адәмдә әмәс!» Бу сөзни қизлар тәңла қайтилап, көрсәткүч бармиғимизни маңлийимизға апирип раса күлүштуқ. Биз өзимизни бир пәйт худди оқуғучидәк һис қилиштуқ. Яшлиқни әскә елип, уссулға чүштуқ. Андин дидар ғенимәт дәмлирини сүрүп, ахирқи он жилда йүз бәргән вақиә, йеңилиқлардин хәвәрдар болдуқ. Мәрасим ахирида 60 жиллиқ тәвәллудта учришимиз дәп қарар елип, бир-биримизни қиймай хошлаштуқ. Илаһим, он жилдин кейин сепимиз азаймай, толуқ учришишқа несип қилғай!

Санийәм САДИҚОВА.

Уйғур наһийәси.

Һиссиятлар толған дәқиқиләр

Чоң Чиғанниң топилиқ кочилирида тал чивиқни ат қилип минип, поңзәк тепип, балилиқ һәм нәвқиран яшлиғимизниң өтүп кәткинини сәзмәптимиз. Әйнә шу достлириң бөләкчә қәдирдан һәм садиқ болидекән. Йеқинда Чоң Чиған оттура мәктивини буниңдин 30 жил илгири тамамлиған сабиқ синипдашлар балилиғимиз билән яшлиғимизни әскә елип дидарлаштуқ. Биз 1986-жили Чоң Чиған оттура мәктивидин 32 нәпәр қиз-жигит учум болған едуқ. Үч савақдишимиздин бевақит айрилиптимиз. Улар — Молутҗан Бақиев, Бәхитҗан Сайтамов вә Ғоҗәхмәт Сәлимов. Шуңлашқиму дәсләп қәбирстанлиққа қарап йол туттуқ. Бақилиқ болған қәдинас ағинилиримизниң роһиға атап дуа тәгбир қилғандин кейин аилә әзалири тәрипидин берилгән нәзиргә еғиз тәгдуқ. Шуниңдин кейин иҗаткарлар мәдһийилигән даңлиқ Өсәк дәрияси бойидики «Нур» фазендисида баш қоштуқ. Мәзкүр баш қошушни уюштурушқа Һашимҗан Савутов, Бәхитҗан Садиров, Сәйпидин Тохтаев вә мошу қурларниң муәллипи тәшәббускар болдуқ. Синипдашлиримиз һәрхил кәсипләрни егиләп, жәмийитимиз һаятиниң барлиқ саһалирида әмгәк қиливетипту. Бибинур Анайәтова, Саһинур Вагапова яш әвлат қәлбигә мәрипәт нурини чечиватса, Имһанәм Палтиева медицина саһасида ишләватиду. Дост-яранлиримизниң көпчилиги жутимизда қелип ата-кәсип — деханчилиқ билән шуғуллиниватиду. Җүмлидин Муратҗан Һәмраев билән Иминҗан Азнақуловниң шәхсий дехан егиликлирини бар. Қисқиси, нәғмә-нава, нахша-уссуллар қизитқан дидар-ғенимәт дәмлири қәлбимиздә чоңқур тәсират қалдурди.

Һакимҗан ҒОҖАШЕВ.

Панфилов наһийәси

248 рет

көрсетілді

0

пікір
Алдыңғы мақала Милләтпәрвәр инсанлар ана жутида баш қошти
Келесі мақала Көңлимиз хошаллиққа толди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *