• Кичик вә оттура тиҗарәт
• 30 Тамыз, 2016

«Сәнәм» тортлирини Сәнәм тәйярлайду

Йеқинда бир тонушум  «Сәнәмниң» тортлири бәк мейизлик, наһийәдә торт тәйярлашта униң алдиға өтидиған һечким йоқ», дәп қалди. Шунда көпчиликниң  көңлидин чиқиватқан  тортни әмәс, бәлки уни тәйярлаватқан  қәндәләтчини издәшкә тоғра кәлди. Әтисила Яркәнт шәһиридики мәрикизий базарниң  йенидин өтүветип,«Сәнәм»  қәндәләт дукини» дегән йезиққа көзүм чүшти. Намидин көрүнүп турғинидәк, нан вә нан мәһсулатлири һәрхил түрлири сетилидекән. Дукан тәкчилиридә  рәт-рети билән тизилған чирайлиқ һәм қолайлиқ  қаплардики  мәһсулатларни еливатқан херидарларму хелә бар.  Коробкиларниң сиртиға «Сәнәм» қәндәләт цехи маркиси билән  мәһсулатниң тәйярланған һәм истимал қилиш вақти йезилипту.

— Бу дукандин чоң оғлумниң өйлиниш тойиға керәклик печенье, булочкиларни сетивалған едим. Әнди бу жили иккинчи оғлумниң тойи һарписида йәнә кәлдим, — деди биз сөһбәтләшкән херидарларниң бири. Сетиқчи қиз болса, қоли-қолиға тәгмәй сода қилғач, бизгә: «Һазир, икки  айдин ошуқ болди Яркәнттә тойлар қизиватиду әмәсму, көпчилик алдин-ала буйрутма бериватиду. Қәндәләт цехи Чулуқайда. Мудиримиз — Сәнәм Садиқова дегән  тиҗарәтчи ханим, һели келип қалар» деди. Дегәндәкла, меңиш-туруши чаққан, оттура яшлар чамисидики бир җуган кәлдидә, өзини «Мән Сәнәм болумән» дәп тонуштурди. Униң тәкливи бойичә, сөһбитимиз Чулуқайдики цехта давамлашти. Сәрәмҗан һойла, һашамәтлик бена. Биринчи қәвитидики  цехниң   тазилиғи билән сәрәмҗанлиғиға зоқиңиз келиду. Қәндәләтчи қиз-җуганлар өз иши билән бәнт. Бири пишәрсә, йәнә бири қачилаватиду. Қисқиси, иш қизиған пәйт екән. Цехниң ичи пәчләрниң ишләп турғиниға қаримай, хелила салқин. — Цехтики пәчләрни 2002-жили Хитайдин елип кәлдуқ. Печенье, булочкиларниң 32 түрини пиширишкә мол­җаланған. Әнди силәрни қизиқтуруватқан тортларниң һазирчә 6 түрини пәқәт буйрутма бойичә тәйярлаймиз. Дәсләп пәқәт  Йеңи жил, туғулған күн, тәвәллудларғила буйрутмилар келип чүшәтти.  Һазир һәр күни дегидәк. Тәләп-еһтияҗи үстүн херидарниң көңлидин чиқиш — бизниң муһим вәзипимиз. Һазирчә 15 адәмни иш билән тәминләватимиз. Келәчәктә чоң тиҗарәтни башлисақ, ишчилар санини йәниму көпәйтимиз дегән ойимиз бар, — деди Сәнәм һәдә соалимизға җававән. Сәнәм Садиқова билән сөһбәтлишиватқанда, униң янфониға арам болмиди. Чулуқай йезисидики мәктәп ашханисидин, Қириққудуқ йезисидин, наһийәлик билим бөлүмидин буйрутмилар кәлди. Сәнәм Садиқова һәр жили «Мәктәпкә йол» җумһурийәтлик акциясидә  10 балини мәктәпкә һаҗәтлик вә башқиму иссиқ кийим-кечәк вә оқуш қураллири билән тәминләветипту. Наһи­йәдики Қириққудуқ, Чулуқай, Нағричи, Төвәнки Пәнҗим, Дехан Ғәйрәт йезилиридин  җәми 100 балини   хелә жиллардин бери иссиқ тамақ билән тәминләветипту. Әнди җумһурийәтлик «Уйғур авази» гезитиға һәр жили  20 адәмниң яздурушниму унтумайдекән. Биз бу қетимқи зияритимиздә кичик тиҗарәтниң чоң тиҗарәткә айлинип, әвлаттин әвлатқа қелиши мүмкин екәнлигигә йәнә бир қетим көз йәткүзүдуқ. Гөһәрбүви ИСМАЙИЛҖАНОВА. Панфилов наһийәси.