- Йеңилиқлар
- 30 Тамыз, 2016
Милләтпәрвәр достумизға мәктүп
Йол жирақи болсиму, көңүл жирақи болмисун/ Мән Тохтасун Әйсаров (сүрәттә) билән униңдин 33 жил илгири, йәни улар Уйғур наһийәсиниң Чоң Ақсу йезисидин Чаринға көчүп чүшкәндин тартип билимән. Иккимиз уйғур оттура мәктивиниң 10-синипида бир жилла биллә оқудуқтә, чоң һаятқа учум болуп, һәрян кетип қалдуқ. У Алмута дөләт медицина институтини тамамлап, Уйғур, Талғир наһийәлик ағриқханилирида балилар дохтури болуп ишләйду. Кейин әмгәк паалийитини һәрбий саһада давам қилиш қарариға келиду. Чонҗидики һәрбий қисимда врач хизмитидә болиду. Иш бабида йөткилип жүрүп, 2001-жили Ақтаудики һәрбий қисимларниң биригә келиду.
Һә, мәнму һәрбий хизмитимни давамлаштуруш үчүн 2005-жили бу шәһәргә кәлдим. Шундақ қилип, тәғдир тәққазиси билән синипдишимни 22 жилдин кейин қайтидин учритип, униң билән хизмәтдаш болуп қалдим. Иккимиз янму-ян яшап, аиләвий арилаштуқ. 2011-жили бир мәзгилдә истипаға чиқтуқ. Шуниңдин көп өтмәй теги-тәкти Уйғур наһийәсиниң Ғалҗат йезисидин болған йәнә бир кәсипдишимиз Шаһам Әйсаров үчимиз биллә муңдишип олтирип, тәвәдики уйғурларниң бешини қошуш қарариға кәлдуқ. Бәш жилдин буян җанлиқ паалийәт елип бериватқан җумһурийәтлик Уйғур мәдәнийәт мәркизиниң Маңғистав вилайәтлик шөбиси әйнә шундақ қурулған еди. Бу җәмийәтлик тәшкилатни мән икки жил башқуруп, аиләвий шараитимға бола, йәни жутумға көчүп кетишимгә мунасивәтлик Тохтасунға өткүздүм. Қәдинас ағинәм шуниңдин буян қизғин паалийәт елип бериватиду. Қазақстан хәлқиниң бирлик-достлуғини мустәһкәмләш, хәлқимизниң урпи-адәт, әнъәнилирини сақлаш һәм риваҗландуруш, шәһәр даирисидики һәрхил мәдәний чарә-тәдбирләргә қатнишиш паалийәтлиридә тәвә уйғурлири та һелиғичә активлиғини тонутуп кәлмәктә. Мошуниң һәммисини вәтәнпәрвәр, милләтпәрвәр ағинимиз Тохтасун Әйсаровниң әмгәк-әҗрисиз тәсәввур қилиш тәс. Әйнә шу қәдинас ағинимиз бу күнләрдә һаятиниң әллигинчи даваниға көтирилди. Шу мунасивәт билән биз, Мусаҗан Абдукәримов, Руслан Мамтушуров, Абдуманап Азнибақиевлар аилилиримиз билән, шундақла башқа дост-бурадәрлиримиз намидин қәдинас достумизни сөйүмлүк гезитимиз «Уйғур авази» арқилиқ тәбрикләшни тоғра көрдуқ. Униң җанлиқ җәмийәтлик паалийитигә зор муваппәқийәтләр тиләп, рәпиқиси Гүлзарәм иккисигә һәм икки пәрзәндигә дуниядики бар яхшилиқларни тиләймиз. «Йол жирақи болсиму, көңүл жирақи болмисун» демәкчи, биз уларни дайим әсләп, сеғинип, дидар көрүшүшни арман қилип жүримиз.Мәрүпҗан РӘҺМАНОВ.
Талғир шәһири.403 рет
көрсетілді0
пікір