• Әнҗуман
• 30 Тамыз, 2016

Йеңичә оқутуш мәсилилири қаралди

Йеқинда җәнубий пайтәхттики М.Яқупов намидики 101-мәктәп-гимназиядә Алмута шәһиридә уйғур тилида билим беридиған мәктәпләрдики уйғур тили вә әдәбияти пәни муәллимлириниң әнъәнивий август әнҗумани болуп өтти. Әнҗуманни шәһәрлик билим бериш бойичә «Йеңи технологияләр мәркизи» илмий-методикилиқ лабораториясиниң методисти, филология пәнлириниң намзити Патигүл Мәхсәтова киришмә сөз билән ечип, 2015-2016-оқуш жилида уйғур тили вә әдәбияти пәниниң бүгүнки әһвали һәм дәрисләрдә лайиһиләш усуллириниң нәтиҗидарлиғи һәққидә доклад оқуди. Андин А.Розибақиев намидики 153-мәктәп-гимназияниң муәллими Гүлбәһрәм Еләмова «Муәллимниң кәспий маһарити вә униң риқабәткә қабил шәхс шәкилләндүрүштики роли» мавзусидики доклади билән ой-пикирлирини оттуриға салса, йәнә шу билим дәргаһиниң устазлири Гүлминәм Дуганова билән Ирина Сидиқова уйғур әдәбияти дәрислиридә тәнқидий ойлаш стратегияләрни һәм заманивий инновациялик технологияләрни пайдилиниш бойичә панорамилиқ дәрис үлгилирини көрсәтти. Мәктәп-гимназияниң йәнә бир муәллими Гүлбәһрәм Молотова дәрисләрдә билим беришниң йеңи усуллириниң нәтиҗидарлиғини коучинг арқилиқ көпчилликкә тонуштурди.

Әнҗуман ахирида методист Патигүл Мәхсәтова заманға яндишип, билим бериштәк қийин-мәшәқәтлик кәсиптә йеңи усулларни пайдилиниватқан илғар устазларға Пәхрий ярлиқларни тапшурди. Рашидәм МИРЗӘХМӘТОВА.